Հանրային առողջապահության ապագա հետազոտող Դարշան Շինգալան Երևանի Մխիթար Հերացու անվան պետական բժշկական համալսարան է հասել Հնդկաստանի արևմուտքից՝ Ջամնագար փոքրիկ քաղաքից: 2020 թվականի հունիսին նա ավարտել է Ընդհանուր բժշկության ֆակուլտետը:
26-ամյա Դարշանն իրեն բնութագրում է որպես լավատես մարդ. «Հավատում եմ, որ, չնայած կյանքի դժվարություններին, միշտ հուսադրող որևէ բան կա. կյանքը մեզ հաճելի անակնկալներ է պատրաստում: Ես հանգիստ մարդ եմ, մտերիմ ընկերներիս շրջանակը շատ նեղ է», – ասում է Դարշանը:
Պատմելով բժշկի մասնագիտության ընտրության մասին՝ օտարերկրացի շրջանավարտը նշում է, որ միշտ մտածել է՝ ինչ-որ մեկի ցավը մեղմելը կարող է ազնվական, վեհ կոչում լինել:
«Հենց այդ պատճառով էլ որոշեցի բժիշկ դառնալ: Իմ կարծիքով՝ մարդկանց համար հոգ տանելը, երբ նրանք գտնվում են խոցելի վիճակում, առավելություն է: Բժշկությունն ինձ միանգամից գրավեց: Հիմա, երբ հետադարձ հայացք եմ նետում, հավատում եմ, որ ճիշտ մասնագիտություն եմ ընտրել», – ավելացնում է Դարշանը:
Իսկ թե ինչու ընտրեց Հայաստանը և ԵՊԲՀ-ն հետագա կրթության համար, ապագա հետազոտողը վստահ է՝ ավելի շուտ Հայաստանն իրեն ընտրեց: «Կարծես կանխորոշված էր իմ այստեղ լինելը: Բժշկական համալսարանը գրեթե մեկ դար աշխարհին տվել է օրինակելի ու պրոֆեսիոնալ բժիշկներ: Ես երջանիկ եմ, որ այսքան տարի ապրել եմ Հայաստանում, որը հարուստ պատմությամբ և հնագույն մշակութային ժառանգությամբ գեղեցիկ երկիր է: Ես հայկական մշակույթի, ավանդույթների, հայրենասիրության, ճարտարապետության և բնության երկրպագուն եմ», – անկեղծանում է Դարշանը:
Երևանում իր կյանքը նա համարում է ամենօրյա տոն, կյանքի տոն: «Ես գնահատում եմ և շնորհակալ եմ հայ ժողովրդին բարության, հյուրընկալության, մշակույթի և, իհարկե, համեղ խոհանոցի համար», – ասում է Դարշանը:
Ապագայում նա մտադիր է զարգացնել կարիերան որպես հանրային առողջապահության հետազոտող: «Ես նպատակ ունեմ ամրապնդել կանխարգելիչ բժշկությունը՝ նպաստելով համաշխարհային բարեկեցությանը առողջապահության ոլորտում համատեղ հետազոտությունների միջոցով», – պարզաբանում է հնդիկ շրջանավարտը:
Ներկայումս նա պրակտիկա է անցնում համալսարանական տարբեր հիվանդանոցներում՝ որպես բժշկի օգնական: 2020 թվականի հունիսին համալսարանն ավարտելուց հետո կորոնավիրուսի համավարակի պատճառով որոշեց մեկ տարի մնալ Հայաստանում `աշխատանքային փորձ ձեռք բերելու համար: Բացի մասնագիտական կատարելագործման գործնական մասից, Դարշանը նաև աշխատում է որպես կամավոր հետազոտող ԵՊԲՀ COBRAIN Armenia թիմում, որն ուսումնասիրում է կորոնավիրուսի նյարդաբանական ազդեցությունը մարդու օրգանիզմի վրա:
Աշխատել է նաև պրոֆեսոր Ռ.Յոլյանի անվան Արյունաբանական կենտրոնում՝ որպես հանրային առողջության պրակտիկանտ: Հայաստանում աշխատելու իր փորձը Դարշանը շատ հաճելի և օգտակար է համարում:
«Իմ կարծիքով՝ լավ բժիշկ դառնալու համար կարևոր է ուրիշների հետ վարվել այնպես, ինչպես ցանկանում ենք՝ մեզ հետ վարվեն: Ապագա բոլոր բժիշկներին խորհուրդ եմ տալիս հավատարիմ մնալ կարիերայի աշխարհում իրենց անհատական «ճանապարհորդությանը» և փայփայել այն: Պետք է ձգտեք նախ դառնալ կարեկից մարդ, իսկ այնուհետև հաջողությունները կուղեկցեն ձեզ», – եզրափակում է Դարշան Շինգալան:
Հեղինակ՝ Տաթևիկ Ղազարյան
