ՄԱԿ-ի Բնակչության հիմնադրամի (ՄԱԲՀ) հայաստանյան գրասենյակի ղեկավար Լուսինե Սարգսյանը կառույցի ներկայացուցիչների հետ բժշկական բուհում հանդիպում է ունեցել ԵՊԲՀ ռեկտոր Արմեն Մուրադյանի ու համալսարանականների թիմի հետ:
Ողջունելով հյուրերին` ռեկտորը նշեց, որ թեպետ բժշկական համալսարանում հանդիպում են առաջին անգամ, բայց քաջատեղյակ է կառույցի գործունեությանը, տարիներ առաջ ի պաշտոնե համատեղ աշխատանքի փորձառություն ունեն:
«Ժողովրդագրական ցուցանիշների բարելավումը կարևոր նշանակություն ունի յուրաքանչյուր երկրի համար», – ընդգծեց Արմեն Մուրադյանը` կարևորելով այս նախադրյալի ապահովման համար սոցիալական պայմանների առկայությունը:
Նա համառոտ անդրադարձավ ինչպես սեռով պայմանավորված հղիության արհեստական ընդհատման թեմային, այնպես էլ արտամարմնային բեղմնավորմանը, առողջապահական այլ արդի թեմաների, որոնց ուղղությամբ ծրագրերի անմիջական մասնակիցն ու նախաձեռնողն է եղել:
Խոսելով բուհի գործունեության մասին` նա նկատեց, որ համալսարանական վերլուծական ստորաբաժանումը` «Հերացի» վերլուծական կենտրոնը ստեղծվեց հենց կորոնավիրուսային համավարակից սկսած. բժշկական համալսարանը գիտական գործունեությունը համատեղեց վերլուծականի հետ` հանրությանը տրամադրելով գիտահեն, հավաստի տեղեկատվություն արդի թեմաների շուրջ` շարունակական իրազեկման նախաձեռնություններ ստանձնելով բնակչության հետ:
Ներկայացնելով առաջիկա մասնավորապես 5 տարվա գործունեության ծրագրերը` ՄԱԲՀ գրասենյակի ղեկավարը շեշտեց, որ համատեղ աշխատանքի իրականացման հնարավորություններ են տեսնում երիտասարդների հետ աշխատանքի, ինչպես նաև հետազոտական ներուժի ուժեղացման ուղղությամբ:
Կառույցի կողմից մշակվող սեռական և վերարտադրողական առողջության ուղղությունների մասին խոսեց ՄԱԲՀ հայաստանյան գրասենյակի Վերարտադրողական առողջության ծրագրերի ղեկավար Նարինե Բեգլարյանը:
Նրա տեղեկացմամբ` մշակվել է 50-ից ավելի գործելակարգ և ուղեցույց, իրականացվել են հետազոտություններ, մասնավորապես, անպտղության տարածվածության վերաբերյալ, որի համաձայն տղամարդկանց շրջանում երկրորդային անպտղության մակարդակը զգալիորեն աճել է:
Կառույցը մեծ տեղ է հատկացնում առաջնային բուժօղակում դեռահասների առողջապահական ծառայությունների հասանելիության բարձրացմանը:
Ակտիվ հարցուպատասխանի, առկա խնդիրների շուրջ տեսակետների փոխանակման անմիջական մթնոլորտում անցավ հանդիպումը. պայմանավորվածություն ձեռք բերվեց առաջիկայում հիմնադրամի ներկայացուցիչների մասնակցությամբ կազմակերպել հանդիպում-քննարկում ուսանողների հետ` վերարտադրողական մի շարք հարցերի շուրջ հարցերի պատասխաններ ստանալով հենց երիտասարդներից:
Կողմերը մեծապես կարևորեցին վերարտադրողական առողջության հետ կապված հարցերի լուծման ուղղությամբ կրթական ծրագրերի կյանքի կոչումը, ինչպես բուհի ամբիոնների, այնպես էլ այլ ստորաբաժանումների ներգրավմամբ:
Առաջարկվեց համատեղ հուշագրով ամրագրել համագործակցության շրջանակը։
