ԵՊԲՀ-ում մեկնարկեց «Համալսարանական մանկաբուժության արդի խնդիրները» երկրորդ միջազգային համաժողովը:
Մի շարք մանկաբույժներ հանդես եկան զեկուցումներով՝ ներկայացնելով մանկաբուժությանը վերաբերվող արդիական խնդիրներ, որոնք առկա են թե՛ Հայաստանում, թե՛ ամբողջ աշխարհում:
«Մուրացան» համալսարանական հիվանդանոցի մանկաբուժության թիվ 2 կլինիկայի ղեկավար, ԵՊԲՀ մանկաբուժության թիվ 1 ամբիոնի վարիչ Նունե Բաղդասարյանը խոսելով ռեսպիրատոր բժշկության մանկաբուժության հարցերի մասին, շեշտեց, որ բրոնխաօբստրուկտիվ համախտանիշը սոցիալական, տնտեսական և բժշկական լրջագույն պրոբլեմ է նախադպրոցական տարիքի համար, և գիտության համար հանդիսանում է հետազոտական լուրջ դաշտ:
«Յուրաքանչյուր հասարակության հիմքը երեխաների առողջության պահպանումն է, իսկ այն ենթադրում է որակյալ կադրերի պատրաստում, մոր և մանկան առողջության պահպանում, ինչպես նաև անվտանգ, որակյալ և մատչելի բուժօգնության իրականացում: Մանկաբուժությունն այն գիտական բնագավառն է, որը շատ ինտենսիվ է զարգանում, այդ իսկ պատճառով գրավիչ է ոչ միայն մանկաբույժների, այլև մյուս բժիշկների համար»,-ասաց նա:
Պրոֆեսորի խոսքով՝ համալսարանական մանկաբուժության նպատակը մանկաբուժական ծառայության և կրթության բարելավումն է:
Զեկուցման մյուս թեմաները ևս կարևոր էին: Մանկաբույժ, պրոֆեսոր Սիմոն Ռանդքուիստը հանդես եկավ «Մանկաբուժական գիտելիքների ազգային աջակցությունը Շվեդիայում» զեկուցումով, խոսելով նաև երիկամների և միզուղիների խնդիրների ախտորոշման և բուժման մասին:
Իսկ պրոֆեսոր Աննա Գևորգյանը ներկայացրեց բժշկական կազմակերպման սկզբունքները դաշնային կենտրոնի ամբուլատոր օղակում:
Նշենք, որ համաժողովն իրականացվում է ՀՀ առողջապահության նախարարության, Մ. Հերացու անվան Երևանի պետական բժշկական համալսարանի և Նեոնատալ բժշկության հայկական ասոցիացիայի աջակցությամբ:
Համաժողովը կշարունակվի նաև վաղը, որի ընթացքում ևս կներկայացվեն արդիական թեմաներ, ինչպիսիք են՝ սուլող շնչառության ախտորոշման և բուժման մոտեցումները, հոդաբորբերը, խիստ ցածրաքաշ նորածինների կենսունակությունը, երկաթի պակասի երեխաների առողջության մեջ և այլն