Բոստոնի բժշկական կենտրոնի Սննդաբանության և քաշի կառավարման կենտրոնի ղեկավար Կարոլին Ապովյանը՝ ԵՊԲՀ այցելու պրոֆեսոր

2017թ. դեկտեմբերի 31-ից Բոստոնի համալսարանի բժշկության դպրոցի պրոֆեսոր, Բոստոնի բժշկական կենտրոնի Սննդաբանության և քաշի կառավարման կենտրոնի ղեկավար Կարոլին Ապովյանը համատեղությամբ կհանդիսանա նաև Երևանի Մխիթար Հերացու անվան պետական բժշկական համալսարանի էնդոկրինոլոգիայի ամբիոնի պրոֆեսոր:

Պրոֆեսոր Ապովյանը բժշկական կրթություն է ստացել Նյու Ջերսիի բժշկության և ատամնաբուժության համալսարանում, այնուհետև Հարվարդի բժշկության դպրոցի New England Deaconess բժշկական կենտրոնում անցել է ռեզիդենտուրա և ստացել սնուցման ու մետաբոլիզմի նեղ մասնագիտացում: 1998-2000թթ. պրոֆեսոր Ապովյանը եղել է Հարվարդի բժշկության դպրոցի Brigham and Women՛s հիվանդանոցի քաշի կառավարման ծրագրի ղեկավարը, իսկ 1996-2000թթ. Spence Centers for Women՛s Health-ի քաշի կառավարման և սննդաբանության ծրագրի ղեկավարը: Բոստոնի համալսարանում սննդաբանության կրթության զարգացման համար պրոֆեսորը American Society of Clinical Nutrition-ի կողմից արժանացել է Physician Nutrition Specialist մրցանակին: Նա 200-ից ավելի գիտական աշխատանքների և հոդվածների հեղինակ է. դրանք տպագրվել են աշխարհի հեղինակավոր գիտական ամսագրերում: Վերջերս տպագրվել է նրա The Age-Defying Diet գիրքը:

Կարոլին Ապովյանը նաև The Overnight Diet և The ALLI Diet Plan գրքերի հեղինակն է: 1992թ. Կարոլին Ապովյանը The Obesity Society-ի անդամ է, որտեղ 2005-2008թթ. աշխատել է կլինիկական խորհրդում, ինչպես նաև գործադիր մարմնում որպես քարտուղար-գանձապահ: