Բժշկական մայր բուհում դեկտեմբերի 7-ին անցկացվեց Օպերատիվ վիրաբուժության և տեղագրական անատոմիայի ամբիոնի ուսանողական գիտական խմբակի կողմից կազմակերպած օլիմպիադան:
Ձևավորվել էր 9 թիմ (յուրաքանչյուր թիմում 6 մասնակից): Թիմերի հետ, շուրջ մեկ ամիս, տարվել են նախապատրաստական աշխատանքներ: Արդյունքում բոլոր թիմերը հաղթահարեցին հետևյալ փուլերը` վիրաբուժական հանգույցներ, գործիքներ, կարեր, վիրակապեր, վիկտորինա, սև արկղ:
Օլիմպիադայի ժամանակ ուսանողների աշխատանքը ստուգում և գնահատում էին ոլորտի փորձառու մասնագետները` անվանի բժիշկներ, դասախոսներ:
Ժյուրիի անդամները ողջունեցին նախաձեռնության կազմակերպումը, խմբակում և խմբակից դուրս ուսանողների ակտիվությունը, շեշտեցին նրանց գործնական հմտությունների զարգացման կարևորությունը:
Օպերատիվ վիրաբուժության և տեղագրական անատոմիայի ամբիոնի վարիչ, պրոֆեսոր Սեմյոն Օրդույանը ողջունեց խմբակի կողմից հաջող օլիմպիադայի կազմակերպումը, նրանց ակտիվությունն ու պատրաստակամությունը՝ նշեց՝ չափազանց կարևոր է բժշկական համալսարանի ուսանողի համար պարզագույն վիրաբուժական և առաջին օգնության հմտություններին տիրապետելը:
Օլիմպիադայի մասնակիցներին իրենց խոսքերն ուղղեցին բժշկական գիտությունների դոկտոր, Ռազմադաշտային վիրաբուժության ամբիոնի վարիչ Կամո Շաբոյանը, «Աստղիկ» ԲԿ-ի էնդոկրին վիրաբույժ և ընդհանուր վիրաբուժության ամբիոնի դոցենտ Արմեն Վարժապետյանը:
Դեկտեմբերի 14-ին, ժամը 10:00-ին Էմիլ Գաբրիելյանի անվան լսարանում տեղի կունենա ամփոփիչ կոնֆերանսը, որի ընթացքում կներկայացվեն կիսամյակի լավագույն զեկույցները:
