ԵՊԲՀ միջազգային գործունեության և արտաքին կապերի գծով պրոռեկտոր Երվանդ Սահակյանը, Օտարերկրացիների ուսուցման դեկանատի դեկան Գայանե Ավետիսյանը և փոխդեկան, Կարիերայի կենտրոնի ղեկավար Խաչատուր Մարգարյանը հանդիպեցին Շրի Լանկայից մեր երկիր բժշկական կրթություն ստանալու նպատակով ժամանած ուսանողների հետ։
Ողջունելով ապագա բժիշկներին՝ Խաչատուր Մարգարյանը հույս հայտնեց, որ նրանց ուսումնառությունն արդյունավետ կանցնի բժշկական համալսարանում։ Երկրորդ կուրսի ուսանողներին փոխդեկանը կոչ արեց աջակցել իրենց նորեկ ընկերներին՝ հաղթահարելու ուսման ընթացքում ծագող դժվարությունները։
«Բարի գալուստ ձեր երկրորդ տուն, ձեր երկրորդ ընտանիք՝ Երևանի պետական բժշկական համալսարան։ Մենք իրականում աշխատում ենք ընտանիքի նման։ Բժիշկ դառնալու ուղին բավականին բարդ է։ Դուք ընտրել եք այս ճանապարհը, հետևաբար պետք է լավ սովորեք, ջանասիրաբար աշխատեք և մասնակցեք բոլոր դասերին»,-նշեց դեկան Գայանը Ավետիսյանը։
Օտարերկրացիների ուսուցման պատասխանատուների հետ հանդիպումները կլինեն շարունակական:
