Երևանի Մխիթար Հերացու անվան պետական բժշկական համալսարանի ստոմատոլոգիական ֆակուլտետի ուսանողների գործնական հմտությունները կգնահատվեն OSCE (Objective Structured Clinical Examination – Օբյեկտիվ կառուցվածքային կլինիկական քննություն ՕԿԿՔ) ձևաչափով:
Ստոմատոլոգիական ֆակուլտետի դեկան Լազար Եսայանը մանրամասնել է քննության ձևաչափի և առանձնահատկությունների մասին:
«Ստոմատոլոգիական ֆակուլտետի միջազգային հավատարմագրման ճանապարհին ձեռնամուխ ենք եղել ամփոփիչ ատեստավորման առաջին փուլը` գործնական հմտությունների ստուգումն իրականացնելու OSCE ձևաչափով: Մայիսի 27-ին իրականացրինք OSCE ձևաչափով ատեստավորման փորձնական տարբերակը: Հրավիրված էին դասախոսները, ուսանողական խմբերի ավագները: Նրանց մասնակցությամբ, Ուսանողական խորհրդարանի հետ համատեղ նկարահանեցինք ուղեցույց-տեսահոլովակ` ավարտական կուրսի ուսանողների համար, որպեսզի նրանք ավելի լավ ծանոթանան OSCE ձևաչափով ատեստավորման ընթացակարգին, չնայած այդ ամենը տեսականորեն նրանց արդեն մանրամասնորեն բացատրվել էր արտադրական խորհրդակցության ընթացքում»,- նշեց դեկանը: Նկարահանման ընթացքում ուսանողները ծանոթացան կայանների կառուցվածքին, մուտքի, ելքի ազդանշաններին, ընթացակարգի ողջ տեխնիկական գործընթացին և փորձեցին այդ ամենն` իրենց անմիջական մասնակցությամբ: Հիմնական քննական կայաններից բացի, կա նաև հանգստի կայան, որտեղ ատեստավորվող ուսանողը հնարավորություն ունի հանգստանալու: Ատեստավորման այս փուլը մեկնարկում է հանձնաժողովների քարտուղարների մոտ ուսանողի գրանցմամբ, համապատասխան ծածկագիրը խալաթին փակցնելով և անհատական թերթիկի տրամադրումով:
Վերջինիս վրա նշված է տվյալ ուսանողի` տարբեր կայաններ մուտք գործելու հերթականությունը: Մեկնարկային կայանի համարն ընտրվում է ուսանողի կողմից` վիճակահանության սկզբունքով: Տարբեր խմբերի համար կայանների առաջադրանքները տարբեր են:
Հետևելով ձայնային ազդանշաններին` բոլոր կայանների առաջադրանքները կատարելուց հետո ուսանողը վերադարձնում է քարտուղարին իր անհատական թերթիկը և լքում քննական տարածքը: Ատեստավորման այս փուլը գնահատվում է ստուգարքի ձևով, և արդյունքները հայտարարվում խմբի ատեստավորման ավարտին` ամփոփելով տարբեր կայանների տվյալները:
Դրական արդյունքով ատեստավորված ուսանողները պատրաստվում են հաջորդ փուլերին` ըստ նախապես սահմանված ժամանակացույցի:
2024-2025 ուստարվա ամփոփիչ ատեստավորումը մեկնարկելու է հունիսի 2-ին:
Ստոմատոլոգիական ֆակուլտետի դեկանատը և մասնագիտական ամբիոնները կարճ ժամանակահատվածում թիմային համատեղ ակտիվ աշխատանքի շնորհիվ նախապատրաստվել են OSCE ձևաչափով ատեստավորման իրականացմանը` ներկայացնելով կատարված մեծածավալ աշխատանքի վերջնական արդյունքները:
