Հայաստանում թքագեղձերի ուռուցք ունեցողների թիվը տարեցտարի աճում է. հայ մասնագետների հոդվածը Springer հրատարակչության ամսագրում

Հայաստանում թքագեղձերի ուռուցքներով պացիենտների թիվը տարեցտարի աճում է։

Համալսարանական առաջատար մասնագետները միջազգային հեղինակավոր Springer հրատարակչության ամսագրում հրապարակել են «Թքագեղձերի պաթոլոգիաների համաճարակաբանությունը Հայաստանի չափահաս բնակչության շրջանում» խորագրով հոդվածը:

Մեր երկրում ԵՊԲՀ ռեկտոր, պրոֆեսոր Արմեն Մուրադյանի գլխավորությամբ անցկացված հետազոտությունները, որոնք ներառել են բոլոր խոշոր բազմապրոֆիլ հիվանդանոցները, ցույց են տվել, որ տարեցտարի մեր երկրում աճում է թքագեղձերի չարորակ նորագոյացությունների թիվը։ Դրանք երկու անգամ ավելի հաճախ հանդիպում են կանաց մոտ։

Հարկ է նշել, որ, ցավոք, մեր բնակչության շրջանում չարորակ ուռուցքների ամենաբարձր տոկոսը կազմում են նախկինում չբուժված բարորակ ուռուցքները, որոնք ժամանակի ընթացքում վերածվում են չարորակի։

Ինչ պետք է հիշել և ինչից պետք է խուսափել.

• Չափազանց կարևոր է դիմել մասնագետի, եթե գլխի կամ պարանոցի շրջանում շոշափեք կլորավուն ցավոտ կամ անցավ գոյացություն,
• Նույնիսկ եթե այն փոքր է,
• Նույնիսկ եթե երկար ժամանակ է շոշափվում,
• Արգելվում է տաքացնող թրջոցներ /կոմպրեսներ/ կամ բուսական այլ միջոցներ դնել գոյացությունների վրա,
• Արգելվում է տաքացնող քսուքներ քսել գոյացությունների վրա,
• Հիշեք, որ ցանկացած ուռուցք ավելի հեշտ է բուժել վաղ շրջանում, քան բարձիթողի փուլերում:

Ընտանեկան բժիշկները, ըստ հետազոտության եզրակացության, կարող են կարևոր դեր խաղալ թքագեղձերի պաթոլոգիաների վաղ ախտորոշման և կառավարման գործում:

Պարտադիր բժշկական ապահովագրության ներդրումը և թքագեղձերի նորագոյացությունների արագ ախտորոշումն ու բուժումը կարող են կանխել բարդացած դեպքերի զարգացումը, բարելավել բուժման ելքը և նվազեցնել բուժման ծախսերը:

Հոդվածին մանրամասն ծանոթանալու համար կարող եք անցնել հետևյալ հղումով: