Բժշկական մայր բուհի Ընդհանուր բժշկության ֆակուլտետի երրրոդ կուրսի ուսանող Մարիամ Սարգսյանը համատեղում է բժշկությունն ու սպորտը:
Բարձր առաջադիմություն ունեցող ապագա բժիշկը նշում է՝ եթե սիրում ես մասնագիտությունը և սպորտը՝ ապա ժամանակ գտնելու հարցում խնդիր չի առաջանում:
«Փոքր ժամանակ հորեղբորս աղջկա հետ վիճում էինք, թե ով է բժիշկ դառնալու։ Նա ասում էր սրտի վիրաբույժ եմ ուզում դառնալ, ես ՝ նույնը։ Անընդհատ այդպես ասելով ու մայրիկիս հորդորներով, կենսաբանություն սիրելով` ես հիմա բժշկականում եմ` երազանքի ճանապարհին»,-պատմում է նա, որը բացի անվճար համակարգում սովորելուց և սպորտով զբաղվելուց նաև աշխատում է։
Խոսելով սպորտային հաջողությունների մասին, Մարիամը նշում է՝ բազկամարտ սկսել է պարապել 2022թ. մարտից, սակայն մինչ այդ ունեցել է բազմաթիվ ձեռքբերումներ:
«Մասնակցել եմ դպրոցական առաջնությունների երկու անգամ և երկու անգամն էլ գրավել 2-րդ հորիզոնականը։ Մարզված չեմ եղել այդ ժամանակ։ Միջբուհական 22-րդ առաջնությանը 2-րդ հորիզոնականն եմ զբաղեցրել, միջբուհական 23-րդ առաջնությանը՝ 1_ին, որից հետո սկսել եմ մարզվել բազկամարտով։ Իմ հաջողություններում մեծ դեր ունի մարզիչս՝ Մհեր Ղազարյանը, ում երախտապարտ եմ: Հայաստանի առաջնությանը, որին առաջին անգամ էի մասնակցում, վնասվածքի պատճառով գրավել եմ աջ ձեռքով 2-րդ, ձախ ձեռքով՝ 3-րդ, իսկ միջբուհական 23-րդ խաղերին՝ 1-ին հորիզոնականը, միջբուհական 24֊րդ խաղերին՝ աջ և ձախ ձեռքով կրկին 1-ին հորիզոնականը։ Հայաստանի հանրապետության բաց առաջնությանը, որը մենք էինք կազմակերպել աջ և ձախ ձեռքերով` 1-ին հորիզոնականն եմ զբաղեցրել։ Մայիսին տեղի ունեցած Հայաստանի առաջնությանը աջ և ձախ ձեռքերով բազկամարտի Հայաստանի չեմպիոն եմ ճանաչվել»,-նշում է Մարիամը՝ հավելելով, որ մասնակցել է նաև ԵՊԲՀ միջֆակուլտետային 2 առաջնություններին և գրավել 1-ին տեղը։ Այժմ պատրաստվում է Եվրոպայի առաջնությանը՝ 65 կգ քաշային կարգում։
Ապագա բժիշկը ցանկանում է որպես նեղ մասնագիտություն ընտրել վիրաբուժությունը, թեև մարզական հաջողություններով պայմանավորված ուշադրությունը կենտրոնացել է նաև վնասվածքաբանության բնագավառի վրա:
