Երևանի Մխիթար Հերացու անվան պետական բժշկական համալսարանում այսօր ստոմատոլոգիական և դեղագիտական ֆակուլտետի դեկանները հանդիպեցին առաջին կուրսի ուսանողների հետ:
Հաշվի առնելով կորոնավիրուսային համաճարակը, պահպանելով հակահամաճարակային կանոնները՝ ֆակուլտետի դեկանները և փոխդեկաններն առանձին խմբերով բուհում ընդունեցին առաջին կուրս ընդունված՝ ստոմատոլոգիական ֆակուլտետի 132 և դեղագիտական ֆակուլտետի 92 ուսանողի:
Ստոմատոլոգիական ֆակուլտետի դեկան Լազար Եսայանը՝ շնորհավորելով ուսանողների մուտքը բժշկական համալսարան, նշեց. «Պատվաբեր է սովորել բժշկական համալսարանում: Դուք ընտրել եք հետաքրքիր, միաժամանակ պատասխանատու և դժվար մասնագիտություն»: Ստոմատոլոգիական ֆակուլտետի դեկանը հավելեց, որ բժշկական համալսարանը տալիս է ոչ միայն գիտելիք, այլև դաստիարակություն: Լազար Եսայանը վստահեցրեց, որ դեկանատն ուսանողի կողքին է ցանկացած խնդրի դեպքում: Նա ապագա բժիշկներին հորդորեց լինել ազնիվ, ինչը բուհում բարձր է գնահատվում:
Դեղագիտական ֆակուլտետի դեկան Բագրատ Ենոքյանը ֆակուլտետի առաջին կուրսեցիներին ընդունեց ակադեմիկոս Էմիլ Գաբրիելյանի անունը կրող 4-րդ լսարանում: Անդրադառնալով ֆակուլտետի ստեղծման պատմությանը՝ նշեց, որ այն ստեղծվել է 1972 թվականին: «Շատ խորհրդանշական է, որ այսօր մենք ձեզ դիմավորում ենք այն լսարանում, որը կրում է ֆակուլտետի հիմնադրի՝ դեղաբան և բժիշկ Էմիլ Գաբրիելյանի անունը»,- ասաց նա: Ողջունելով առաջին կուրսեցիների մուտքը՝ դեկանն ընդգծեց, որ ԵՊԲՀ ուսանող լինելը մեծ պատիվ է և պարտավորություն:
Ստոմատոլոգիական և դեղագիտական ֆակուլտետի դեկաններն առաջին կուրսեցիներին ներկայացրեցին ուսումնական գործընթացին վերաբերող հարցերը, անդրադարձան բուհում ուսանողների իրավունքներին ու պարտականություններին:
Նշենք, որ 2020-2021 ուսումնական տարում Երևանի Մխիթար Հերացու անվան պետական բժշկական համալսարան ընդունվել է 719-ը ուսանող, որից 462-ն՝ ընդհանուր բժշկության, 132-ը՝ ստոմատոլոգիական և 92-ը՝ դեղագիտական ֆակուլտետ:
