Կայքը դեռ գտնվում է փորձարկման փուլում։
The site is still under testing.

Նյարդաբանության պրոֆեսոր Լիդիա Գիմոյանի դեղատոմսը

Նյարդաբանության պրոֆեսոր Լիդիա Գիմոյանի դեղատոմսը

Մեկդարյա բժշկական բուհի ավագ սերնդի, փորձառու մասնագետների  մասին պատմող հերթական ակնարկը Նյարդաբանության ամբիոնի պրոֆեսոր Լիդիա Գիմոյանին է նվիրված:

Նա 1971 թվականին ավարտել է Երևանի պետական բժշկական համալսարանի ընդհանուր   բժշկության ֆակուլտետը՝ ստանալով բուժական գործի մասնագետի որակավորում:

1971-1972 թթ.  Երևանի թիվ 6 կլինիկական հիվանդանոցում սովորել է ինտերնատուրայում՝ նյարդաբանություն մասնագիտությամբ:

1973 թ. վերապատրաստվել  է Մոսկվայում՝ Բուրդենկոյի անվան նյարդավիրաբուժական  ինստիտուտում:

Այնուհետև 1972-1977 թթ., ապա 1977-1985թթ. աշխատել է 1-ին կլինիկական հիվանդանոցում և Հանրապետական հիվանդանոցում՝ որպես նյարդաբան:

1985 թ. աշխատել է թիվ 2 բուժմիավորումում՝ որպես նյարդաբանական բաժանմունքի վարիչ, 2008թ-ից՝ որպես նյարդաբանական ծառայության ղեկավար:

2000թ.  առ այսօր դասավանդում է ԵՊԲՀ նյարդաբանության ամբիոնում՝ սկզբում որպես ասիստենտ, ապա դոցենտ, հետո պրոֆեսոր:

2000-2003թթ. ԵՊԲՀ ուղեգրով սովորել է դոկտորանտուրայում՝ Ուկրաինայի գերոնտոլոգիայի ինստիտուտում: 2004թ. պաշտպանել է դոկտորական թեզ «Հայաստանում ցերեբրովասկուլյար հիվանդությունների հիվանդացության և մահացության դինամիկան»  թեմայով:

«Իմ գիտաբժշկական գործունեության ընթացքում բազմիցս մասնակցել եմ տեղական և միջազգային գիտաժողովների, սեմինարների, վերապատրաստման դասընթացների, ունեմ 33 տպագիր աշխատանք, ղեկավարել եմ թեկնածուական թեզ»,-նշում է անվանի բժիշկը:

 Առողջապահության համակարգում  բարեխիղճ, անմնացորդ, տարիների աշխատանքի և  ՀՀ բուժաշխատողի օրվա առթիվ Լիդիա Գիմոյանը պարգևատրվել է:

2010 թ. ստացել է ԵՊԲՀ հոբելյանական «արծաթե կրծքանշան»-ի՝ կրթության, գիտության, բժշկության և աշխատանքային այլ բնագավառներում անբասիր գործունեության համար: 1986–1998թթ. Լիդիա Գիմոյանը ղեկավարել է 2-րդ բուժմիավորման նյարդաբանական  բաժանմունքը:                                                                          

 2007-ից առ այսօր ղեկավարում է նույն բժշկական հաստատության նյարդաբանության ծառայությունը:

 

Մեզ հետ զրույցում  Լիդիա Գիմոյանը բացահայտում է, թե ինչու է ընտրել բժշկի մասնագիտությունը: 

«Իմ կարծիքով, բժշկությունը ազնվագույնն է բոլոր մասնագիտությունների և արվեստների մեջ, այդ պատճառով որոշեցի դառնալ բժիշկ և օգնել մարդկանց, հոգ տանել մարդու համար ամենաթանկի՝ առողջության մասին: Բժիշկ լինելը ոչ միայն մասնագիտություն է , այլև ապրելակերպ»,-նշում է անվանի բժիշկը՝ ընդգծելով նաև, թե ինչու ընտրեց հենց նյարդաբանի մասնագիտությունը:

«Ուսումնառության ընթացքում հասկացա, որ հիվանդությունների առաջացման պատճառներից մեկը հոգու անհանգստությունն է, աններդաշնակությունը մարմնի, մտքի հետ: Իսկ նյարդաբանությունը մարդու հոգեկան և սոմատիկ աշխարհները կապող օղակն է: Այդ է վկայում նաև Սոկրատեսի այն միտքը, որ «հնարավոր չէ բուժել մարմինը ՝ չբուժելով հոգին»: Բացի այդ, նյարդաբանությունը զարգացող և դեռևս բացահայտման կարիք ունեցող հեռանկարային ճյուղերից մեկն է: Այժմ աստիճանաբար զարգանում է միջդիսցիպլինար նյարդաբանությունը, որը ներառում է կարդիոնևրոլոգիան, նեյրոէնդոկրինոլոգիան, նեյրոիմունոլոգիան, նեյրոհոգեբուժությունը, նեյրոռևմոտոլոգիան, նեյրոսննդաբանությունը: Սա ապացույցն է, որ նյարդաբանությունը կապող օղակ է նաև բժշկության բոլոր ճյուղերի միջև»,-շեշտում է Լիդիա Գիմոյանը:

Նրա խոսքով՝ ճշգրիտ ախտորոշման համար պետք է ունենալ մասնագիտական խորը գիտելիքներ, լինել հոգեբան և փիլիսոփա, մանրակրկիտ ուսումնասիրել հիվանդի բժշկական պատմությունը, ստեղծել անկաշկանդ և վստահելի կապ հիվանդի հետ:

Բժշկության մեջ հիմնական դեղատոմսը բժիշկն է: Բժիշկը նախ հոգեբանորեն պետք է տրամադրի հիվանդին բուժմանը, ճիշտ գնահատի իրավիճակը, ուղեկցող հիվանդությունների առկայության դեպքում նշանակի թիրախային բուժում և վերահսկի ընթացքը: 

 «Քանի որ ներկայումս մեծ թիվ են կազմում մուլտիմորբիտ հիվանդները, և առկա է վտանգ պոլիպրոգմազիայի, աստիճանաբար զարգանում է այսպես կոչված Hub – թերապիան, որը բարելավելով մետաբոլիկ փոխանակությունը միտոքոնդրալ մակարդակով, միաժամանակ բուժիչ ազդեցություն է թողնում մի քանի օրգան համակարգերի վրա»,-ընդգծում է հայտնի նյարդաբանը:

Մարդկանց պրոֆեսորը հորդորում է վարել առողջ ապրելակերպ.

«Ավելի հեշտ է հիվանդությունը կանխարգելել, քան բուժել: Ուստի, պետք է վարել առողջ ապրելակերպ, հետևել սննդակարգին, դրսևորել ֆիզիկական ակտիվություն՝ չմոռանալով մտավոր և հոգևոր գործունեության մասին, խուսափել սթրեսից, որը բացասաբար է ազդում իմունային համակարգի վրա` հանգեցնելով տարբեր հիվանդությունների առաջացման: Իզուր չէ, որ ժողովուրդն ասում է, որ «բոլոր հիվանդությունները գալիս են նյարդերից»:

Հիվանդն էլ իր հերթին պետք է լինի հետևողական իր առողջության հանդեպ և ճիշտ ժամանակին դիմի բժշկին»:

Ապագա բժիշկներին Լիդիա Գիմոյանը խորհուրդ է տալիս ամենակարևորը սիրել մասնագիտությունը, ամեն օր զբաղվել ինքնակրթությամբ, յուրացնել նորարարությունները, ցուցաբերել անհատական վերաբերմունք յուրաքանչյուր հիվանդին:

«Հիվանդը չի կարող ներել բժշկի անտարբերությունը: Եղեք մարդասեր և հոգատար»,-եզրափակում է բժշկական բուհի երկար տարիների փորձ ունեցող աշխատակիցը: