Բժշկական մայր բուհի կենտրոնական մասնաշենքում տեղակայված Հայաստանի բժշկության պատմության թանգարանը այցելուի համար ոչ միայն մշակութային օջախ է, այլև կրթարան, որը հնարավորություն է տալիս ծանոթանալ բժշկագիտության պատմությանը, տեսնել անվանի գիտնականների ձեռագրերը, անձնական իրերը, բժշկական գործիքները, մասնագիտական շատ ու շատ հետաքրքիր հարցերի պատասխաններ ստանալ:
ԵՊԲՀ թանգարան մեկ տարվա ընթացքում հասցրել են այցելել հանրապետության 2000-ից ավելի դպրոցների աշակերտները, այնպես էլ բժշկությամբ հետաքրքրված անձիք:
Օրեր առաջ թանգարան կատարած այցի տպավորություններով է մեզ հետ կիսվել կենսաբանության ուսուցիչ Բյուրեղ Կեոշքարյանը, որը «Դասավանդի՛ր,Հայաստան» ծրագրի շրջանակներում աշխատում է Դաշտավանի Գերասիմ Տոնոյանի անվան միջնակարգ դպրոցում:
«Ութերորդ դասարանի աշակերտներիս հետ այցելեցի ԵՊԲՀ թանգարան: Այցելության ընթացքում մեր էքսկուրսավարի օգնությամբ ծանոթացանք համալսարանի պատմությանը, աշակերտնները շատ գոհ էին այցից, քանի որ այն օգնեց նրանց ավելի լավ հասկանալ բժշկության աշխարհը, նաև տեսանք, թե ինչպես է համալսարանը զարգացել իր բացման օրվանից»,-նշեց Բյուրեղ Կեոշքարյան:
Նրա խոսքով, տպավորությունները մեծ էին նաև անատոմիական թանգարան կատարած այցից, որտեղ աշակերտները հնարավորություն են ունեցել տեսնելու իրական օրգաններ, որոնք օգնեցին նրանց ավելի լավ հասկանալ մարդու անատոմիան:
ԵՊԲՀ բժշկության պատմության թանգարանի տնօրեն Նարինե Ղազարյանը ևս ջերմությամբ խոսեց աշակերտների կատարած այցի մասին՝ շեշտելով, որ շատ տպավորված է մարզաբնակ աշակերտների դաստիարակությամբ և խելացիությամբ:
