Հունիսի 1-ը աշխարհի տարբեր անկյուններում, այդ թվում՝ Հայաստանում, նշում են երեխաների պաշտպանության միջազգային օրը: Այս գեղեցիկ տոնը ևս մեկ առիթ է անսահման ժպիտներ և երջանիկ ակնթարթներ պարգևելու մանուկներին:
«Բեգլարյան» բժշկական կենտրոնը` կենտրոնի գիտական գծով խորհրդական, ԵՊԲՀ մանկաբարձության և գինեկոլոգիայի թիվ 1 ամբիոնի վարիչ Արմինե Հարությունյանի գլխավորությամբ կազմակերպել էր միջոցառում՝ երեխաների պաշտպանության միջազգային օրվան նվիրված:
Վերջին երեք տարիների ընթացքում «Բեգլարյան» բժշկական կենտրոնում անհաս ծնված երեխաների և զույգերի համար կազմակերպված հետաքրքիր միջոցառման ընթացքում մի շարք անակնկալներ եղան: Մանուկները բանաստեղծություններ արտասանեցին, պարեցին, խաղեր խաղացին աճպարարի հետ:
ԵՊԲՀ մանկաբարձության և գինեկոլոգիայի թիվ 1 ամբիոնի վարիչ Արմինե Հարությունյանը ողջունելով ներկաներին, ջերմորեն շնորհավորեց երեխաների միջազգային օրվա առիթով:
«Դուք ամենաերջանիկ երեխաներն եք, որ ծնվել եք «Բեգլարյան» բժշկական կենտրոնում: Դուք եք կերտելու մեր երկրի ապագան: Ցանկանում եմ անսահման առողջություն, երջանկություն, հաջողություն, ապրեք խաղաղ, հետագայում զբաղվեք ձեր մասնագիտությամբ: Մենք կունենանք ապագա բժիշկներ, ապագա քաղաքագետներ, շինարարներ, մեր ապագան ձեր ձեռքերում է»,-նշեց Արմինե Հարությունյանը:
ԵՊԲՀ մանկաբարձության և գինեկոլոգիայի թիվ 1 ամբիոնի վարիչը հավելեց, որ «Բեգլարյան» բժշկական կենտրոնը հիմնադրվել է դեռևս 1920 թվականին և եղել է Հայաստանի առաջին ծննդատունը. «Այստեղ են սովորել բոլոր մանկաբարձ-գինեկոլոգները: 1925 թվականին հիմնադրվել է Մանկաբարձության և գինեկոլոգիայի թիվ 1 ամբիոն: Մենք ուսուցանում ենք ապագա բժիշկներին՝ 4-6-րդ կուրսի ուսանողներին, օրդինատորներին»:
