«Էնդոկրինոլոգիան լաբորատոր ախտորոշման պրիզմայով» միջազգային գիտագործնական կոնֆերանս-ցուցահանդեսի համանախագահներն էին ԵՊԲՀ կլինիկական լաբորատոր ախտորոշման ամբիոնի վարիչ, «Միքայելյան» վիրաբուժական ինստիտուտի լաբորատորիայի վարիչ, նորաստեղծ Լաբորատոր բժշկության հայկական ասոցիացիայի նախագահ Զարուհի Գևորգյանը և ԵՊԲՀ էնդոկրինոլոգիայի ամբիոնի վարիչ, «Մուրացան» համալսարանական հիվանդանոցային համալիրի էնդոկլրինոլոգիական կլինիկայի ղեկավար, Մանկական էնդոկրինոլոգների հայկական ասոցիացիայի նախագահ ՀՀ ԱՆ մանկական էնդոկրինոլոգիայի գծով խորհրդական` Ելենա Աղաջանովան։
«Ապրիլին կայացած միջոցառման կազմը շատ ներկայացուցչական էր, համաշխարհային հեղինակության մասնագետների մասնակցությամբ: Առաջին անգամ մենք անցկացրինք այս կոնֆերանսը երկու ասոցիացիաներով համատեղ»,- ասաց Զարուհի Գևորգյանը:
Մասնակիցներին ողջունել է ԵՊԲՀ գիտության գծով պրոռեկտոր Կոնստանտին Ենկոյանը:
Միջոցառման հատուկ հյուրն էր այս բնագավառում մասնագիտական խոշոր` IFCC ասոցիացիայի նախկին նախագահ (The International Federation of Clinical Chemistry and Laboratory Medicine) Մաուրիցիո Ֆերարրին, ով նաև դասախոսությամբ հանդես եկավ:
Հյուրերի կազմում էր բժշկական գիտությունների դոկտոր Միխայիլ Գոդկովը:
Կոնֆերասնի շրջանակում անդրադարձ է կատարվել մի շարք ուղղությունների, այդ թվում կալցիումի փոխանակության խանգարումներին, մակերիկամների հիվանդություններին, մետաբոլիկ սինդրոմին, վահանագեղձի հիվանդություններին, դիաբետին:
Շուրջ 250 մասնակից, 25 զեկույց ընդգրկող միջդիսցիպլինար այս հավաքի նախաձեռնողները շնորհակալ են բոլոր բանախոսներին իրենց փորձը ներկայացնելու համար: Մասնակիցներին շնորհվել են մասնագիտական շարունակական զարգացման կրեդիտներ:
