Երևանի Մխիթար Հերացու անվան պետական բժշկական համալսարանի 13 շրջանավարտ «1+2» ծրագիրի շրջանակում ՀՀ ՊՆ մարշալ Արմենակ Խանփերյանցի անվան ռազմական ավիացիոն համալսարանում անցնելով երիտասարդ մարտիկի դասընթաց՝ ընդունվել է ԵՊԲՀ ռազմաբժշկական ինտերնատուրա՝ տալով զինվորական երդում:
ԵՊԲՀ շրջանավարտները 1 տարվա ընթացքում ՀՀ ՊՆ հոսպիտալներում, համալսարանական հիվանդանոցներում և Հայրենիքի պաշտպանի վերականգնողական կենտրոնում ձեռք կբերեն գործնական հմտություններ և կլինիկական ունակություններ, որից հետո, ստանալով լեյտենանտի կոչում, 2 տարի ժամկետով կծառայեն ՀՀ զինված ուժերում՝ որպես զորամասային օղակի բժիշկներ:
Ինտերները բժշկական համալսարանում ստացած կրթությունը նպատակային ուղղվածությամբ կծառայեցնեն Հայոց բանակին: Հիշեցնենք, որ Պաշտպանության նախարարության կողմից առաջին անգամ «1+2» ծրագիրն իրականացվում է բժշկական բուհի առաջարկով՝ 2018 թվականից: ԵՊԲՀ շրջանավարտները ծրագրի շնորհիվ, ծառայության ընթացքում, կկարողանան բժշկական գործունեություն ծավալել զորամասերում:
