Կայքը դեռ գտնվում է փորձարկման փուլում։
The site is still under testing.

ԵՊԲՀ ասպիրանտը ցանկացած գործունեության, երևույթի, խորը, մանրակրկիտ, բազմակողմանի ուսումնասիրությունը գիտություն է համարում

Շարունակում ենք համալսարանական ընթերցողներին ներկայացնել ԵՊԲՀ սովորողներին ու երիտասարդ բժիշկ-գիտնականներին։ Ասպիրանտ Սամվել Բարդակչյանը միշտապես հետաքրքրված է եղել տարբեր երևույթների ավելի խորը ըմբռնմամբ։ Փորձել է ամեն ինչ ավելի հիմնովին հասկանալ ու պատկերացնել։ «Ի սկզբանե, նույնիսկ մինչև ԵՊԲՀ ընդունվելը, մտածել եմ, որ զբաղվելու եմ ոչ միայն կլինիկական, այլև գիտական գործունեությամբ։ Կարծում եմ, որ մեկն օգնում է մյուսին, աշխատանքն ավելի հետաքրքիր ու բազմաբովանդակ դարձնում»,-ընդգծում է երիտասարդ բժիշկ-գիտնականը։

Նա սովորել է Ֆիզմաթ դպրոցում։ 9-րդ և 10-֊րդ դասարաններում մասնակցել է քիմիայի միջազգային օլիմպիադաներին։ 10-րդ դասարանում մենդելեևյան օլիմպիադայից շահել է բրոնզե, իսկ միջազգային օլիմպիադայից՝ արծաթե մեդալ։ Դպրոցն ավարտել է ոսկե մեդալով։ 2007 թ. ընդունվել է ԵՊԲՀ ընդհանուր բժշկության ֆակուլտետ։ «Բարձր առաջադիմության համար 2-րդ կուրսից ստացել եմ Յախշիբեկյանի անվան կրթաթոշակ, իսկ 5-րդ կուրսում նաև Հերացու անվան կրթաթոշակ։ 2014թ. ընդունվել եմ օրդինատուրա ուռուցքաբանության գծով։ 2017թ. ավարտել եմ օրդինատուրան և նույն թվականին սկսել ասպիրանտուրան նույն ամբիոնում պրոֆեսոր Տանանյանի ղեկավարությամբ»,- մանրամասնում է Սամվել Բարդակչյանը։

Մասնագետը, չնայած երիտասարդ տարիքին, հարուստ մասնագիտական ճանապարհ է անցել։ Նրա գիտական հետազոտության թեման նվիրված է կոլոռեկտալ քաղցկեղի դեղորայքային (քիմիաթերապևտիկ և թիրախային) բուժմանը։ Այս ընթացքում բժիշկ-գիտնականը մասնակցել է բազմաթիվ միջազգային գիտաժողովների Հայաստանում և հայրենիքի սահմաններից դուրս, ներկայացրել պոստերներ և բանավոր զեկույցներ։

Աշխատել է «Մուրացան» համալսարանական հիվանդանոցի քիմիաթերապայի բաժնում, իսկ այժմ աշխատում է Յոլյանի անվան Արյունաբանական կենտրոնի մեծահասակների քիմիաթերապիայի բաժնում։ Նաև նույն կենտրոնում ղեկավարում է երեխաների ԿՆՀ ուռուցքների մուլտիդիսցիպլինար խումբը։ Առաջիկայում պլանավորում է մասնագիտական հմտությունների խորացման նպատակով վերապատրաստումներ անցնել արտերկրում։

 

Պատրաստեց Տաթևիկ Գրիգորյանը