Ուրախ ենք հայտնել, որ ԵՊԲՀ-ն Նորարարությունների մրցակցային հիմնադրամի դրամաշնորհային մրցույթի հաղթողների ցանկում է:
Համաշխարհային բանկի հետ համագործակցությամբ իրականացվող «Կրթության բարելավման ծրագրի լրացուցիչ ֆինանսավորում» վարկային ծրագրի շրջանակում ԲՏՃՄ (STEM) ուղղությամբ դրամաշնորհների տրամադրման մրցույթում բարձր գնահատականի է արժանացել Երևանի Մխիթար Հերացու անվան պետական բժշկական համալսարանի կողմից ներկայացված «Ուղեղի վիզուալիզացիայի լաբորատորիա» դրամաշնորհային ծրագրի հայտը:
Ծրագրի բյուջեն, որի իրականացման արդյունքում «ՔՈԲՐԵՅՆ» ուղեղի հիմնարար հետազոտությունների գիտակրթական կենտրոնում կստեղծվի ուղեղի վիզուալիզացիայի լաբորատորիա, կազմում է շուրջ 250 մլն ՀՀ դրամ:
Ծրագրի գործընկերն է ՀՀ ԳԱԱ ակադեմիկոս Լ.Ա. Օրբելու անվան ֆիզիոլոգիայի ինստիտուտը, որի ընտրության համար հիմք է հանդիսացել երկու հաստատությունների արդյունավետ համագործակցության բազմամյա փորձը: