ԵՊԲՀ կարիերայի կենտրոնը կազմակերպել էր անվճար նախապատրաստական դասընթացներ FMGE (Foreign Medical Graduates Examination)՝ արտասահմանյան բժշկական շրջանավարտների քննության հաղթահարումն առավել դյուրին դարձնելու նպատակով։
Այս տարի բժշկական բուհի ծրագրի ավարտական վկայականով պարգևատրվեց 11 հնդիկ շրջանավարտ։
FMGE-ն Հնդկաստանի քաղաքացիների համար նախատեսված լիցենզավորման քննություն է՝ իրենց երկրում բժիշկ աշխատելու իրավունք ստանալու համար:
Հնդկաստանի Հանրապետության բժշկական խորհրդի կողմից անցկացվող քննությանն ամեն տարի մասնակցում են աշխարհի մոտ 60 երկրի 450 համալսարանում ուսանած հնդիկ ուսանողներ:
Կարիերայի կենտրոնի ղեկավար Խաչատուր Մարգարյանի խոսքով՝ ԵՊԲՀ հնդիկ շրջանավարտների մեծ մասը բարեհաջող (առաջադիմությունը կազմում է շուրջ 90-95%) հանձնում է FMGE քննությունը, ինչն աշխարհի բուհերի շրջանում բարձր ցուցանիշ է։ «Ամեն տարի Հնդկաստանի բժշկական խորհուրդը կազմում է վիճակագրություն, որի համաձայն՝ աշխարհի տարբեր համալսարանների շրջանավարտների ցուցաբերած արդյունքների հիման վրա վարկանիշավորում է համալսարանները։ Մեր բուհում կրթություն ստացած հնդիկ ուսանողները, վերադառնալով իրենց երկիր և հաջողությամբ հանձնելով FMGE քննությունը, բարձրացնում են թե՛ ԵՊԲՀ-ի, թե՛ Հայաստանի վարկանիշը միջազգային կրթական հարթակներում», – ընդգծում է Խաչատուր Մարգարյանը։
Հայաստանում Հնդկաստանի դեսպանության հովանու ներքո FMGE անվճար նախապատրաստական դասընթացներն անցկացվում են 2018 թվականից սկսած։
Օտարերկրյա ուսանողների հետ տարվող աշխատանքների բաժնի ղեկավար Ռահուլ Անիլ Սետհիի փոխանցմամբ՝ ուսանողներն ապահովվում են Հնդկաստանից ձեռք բերված համապատասխան գրականությամբ և պարբերաբար տեղեկացվում են քննությանը վերաբերող փոփոխական կանոնակարգերին։
Դասընթացներն անցկացվում են ուսումնառությանը զուգահեռ և տևում են 3 տարի․ մեկնարկը տրվում է 4-րդ, իսկ ծրագիրն ավարտվում է 6-րդ կուրսում։
