Կայքը դեռ գտնվում է փորձարկման փուլում։
The site is still under testing.

Ղազախստանից սովորելու նպատակով հայրենիք վերադարձած ապագա դեղագետը որոշել է՝ կապրի ու կաշխատի Հայաստանում

Ղազախստանից սովորելու նպատակով հայրենիք վերադարձած ապագա դեղագետը որոշել է՝ կապրի ու կաշխատի Հայաստանում

Բժշկական համալսարանի ընդհանուր բժշկության, ստոմատոլոգիական, դեղագիտական ֆակուլտետներում, այդ թվում՝ օտարերկրացիների ուսուցման դեկանատում սովորում է Ռուսաստանից, Վրաստանից, Ուկրաինայից, Ղազախստանից, Սիրիայից, ԱՄՆ-ից, Իրանից, Շվեդիայից, Լիբանանից, Լեհաստանից, Գերմանիայից ժամանած ազգությամբ հայ շուրջ 630 ուսանող:

Ղազախստանում ծնված ու մեծացած ԵՊԲՀ 1-ին կուրսի ուսանող Մադլենա Ծատուրյանը դեղագիտական ֆակուլտետում սովորող այն 10 ապագա դեղագետներից է, որը բարձրագույն կրթություն ստանալու և մասնագիտացում ձեռք բերելու նպատակով վերադարձել է հայրենիք:

Բժշկական համալսարանի ուսանողը սովորել է Ղազախստանի լավագույն գիմնազիայում, մասնակցել է օլիմպիադաների, գրավել պատվավոր հորիզոնականներ: Դպրոցը ոսկե մեդալով ավարտելուց հետո` հայրենիքում սովորելու և ապրելու ցանկությունը նրան բերել է բժշկական բուհ:

«Մանկուց երազել եմ բժշկական համալսարանում սովորելու մասին։ Դպրոցում շատ հետաքրքրված էի քիմիա առարկայով և որոշեցի ընտրել այնպիսի ոլորտ, որն առնչություն կունենան քիմիայի հետ»,-ասում է դեղագիտական ֆակուլտետի ուսանողը՝ ընդգծելով, որ ապագայի նպատակներն իրեն միշտ դրդում են սովորել ու երբեք չծուլանալ:

Մադլենա Ծատուրյանը բժշկական բուհն ավարտելուց հետո նպատակ ունի աշխատել դեղագիտական մեծ ընկերությունում, որտեղ կզբաղվի նոր դեղերի ստեղծմամբ և ուսումնասիրմամբ:

«Ժամանակակից աշխարհում կա դեղանյութերի պատրաստման հիմնախնդիր, այդ իսկ պատճառով դեղագիտությունն ամենաարդիական մասնագիտություններից մեկն է ինձ համար»,-հավելում է ԵՊԲՀ ուսանողը:

Մադլենա Ծատուրյանը նախատեսում է իր մասնագիտական գործունեությունը շարունակել հայրենիքում՝ ներդրում ունենալով Հայաստանում դեղագիտության զարգացման ոլորտում: «Միգուցե հենց դեղագիտությունն էլ դառնա այն ուղին, որի միջոցով Հայաստանը տնտեսապես ավելի կզարգանա և կդառնա մրցունակ զարգացած երկրների շարքում»,-նշում է նա։

Ապագա դեղագետը, խոսելով մասնագիտական որակների մասին, ընդգծում է՝ յուրաքանչյուր մասնագետ նախևառաջ պետք է լինի ուշադիր, հանդուրժող, մարդամոտ, համբերատար, նպատակասլաց և աշխատասեր: Անհրաժեշտ է  լավ սովորել, տիրապետել դեղանյութերին, և որ ամենակարևորն է՝ աշխատանքը կատարել բարեխղճորեն:

Կրթություն ստանալու նպատակով հայրենիք վերադարձած բժշկական համալսարանի ուսանողի ինտեգրումն ավելի հեշտ է ստացվել, քանի որ լեզվի հետ խնդիրներ ի սկզբանե չի ունեցել:

«Տանը միշտ հայերեն ենք խոսել, Հայաստանում մայրենի լեզվով հաղորդակցման խնդիր չեմ ունեցել: Իսկ հայերեն տառերը սովորել եմ ընդունելության քննությանը պատրաստվելիս»,-ընդգծում է Ղազախստանից հայրենիք վերադարձած, Դեղագիտական ֆակուլտետում բարձր առաջադիմությամբ սովորող ապագա դեղագետը:

Ապագայի պլանները Հայաստանի հետ կապող Մադլենա Ծատուրյանին բժշկական բուհը տվել է հայրենակիցներով շրջապատված լինելու հնարավորություն, ինչի մասին նա միշտ երազել է։ «Ունեմ վստահելի ընկերներ, որոնց հետ կիսում եմ նույն հետաքրքրությունները, և որոնց կարող եմ դիմել ցանկացած հարցով»,-եզրափակում է նա։