«Պացիենտ-բուժաշխատող. հաղորդակցման հիմունքները» թեմայով եռօրյա կրեդիտավորված անվճար դասընթացի վերջին օրը «Հերացի» համալսարանական հիվանդանոցի ավագ և միջին բուժաշխատողների համար դասախոսում էր Կլինիկական աշխատանքների կազմակերպման վարչության պետ, Հանրային առողջության և առողջապահության կազմակերպման ամբիոնի ավագ դասախոս Դավիթ Մելիք-Նուբարյանը։
«Հաղորդակցման հիմունքները բժշկական օգնություն և սպասարկում մատուցելիս» զեկույցի շրջանակում դասընթացների նախաձեռնողն անդրադարձավ հաղորդակցման առանձնահատկություններին և կարևորությանը:
«Վիճակագրությունը մեջբերելով` պետք է նշեմ, որ հիվանդների գրեթե 50 տոկոսը չգիտի իր ճշգրիտ ախտորոշումը», – նկատեց նա` ընդգծելով այն գաղափարը, որ հաճախ բուժառուների` իրենց հիվանդության մանրամասներին չտիրապետելը հենց բժշկի հետ ճիշտ հաղորդակցման պակասից է գալիս:
Դասախոսության առանցքը հաղորդակցումն էր, որի նպատակն, ըստ դասախոսի, հետևյալն է՝
«Ողջամիտ հեռավորությունը և փոխադարձ հարգանքը կարող են ձևավորել միջանձնյա դրական հարաբերություններ` չառաջացնելով հաղորդակցման խնդիրներ», – մանրամասնեց Դավիթ Մելիք-Նուբարյանը:
Տեղեկատվության ձևակերպումը, արդյունավետ հաղորդակցումը, հաղորդակցման գնահատումը զեկույցի մաս էին:
Անդրադարձ կատարվեց նաև բուժաշխատողների արտաքին կոկիկ տեսքին, հատկապես՝ երիտասարդ բժիշկների շրջանում խոսքին, վարքագծին հետևելուն:
Եզրափակելով եռօրյա դասախոսությունների շարքը՝ արձանագրվեց, որ առանց հաղորդակցման մարդիկ չեն կարող կայացնել իրենց առողջական վիճակին համահունչ որոշումներ՝ խնդրից առաջ, դրա ընթացքում և հետո:
Հաղորդակցումը պետք է համակարգված լինի պացիենտի հետ շփվող բոլոր
բուժաշխատողների հետ, անհատը պետք է ստանա միասնական տեղեկատվություն իր վիճակի մասին:
Զեկուցումը հագեցած էր հանրային առողջության մասնագետի պրակտիկայից բերվող մեջբերումներով ու հետաքրքիր պատմություններով:
Առաջիկայում հավաստագրված անվճար այս դասընթացները շարունակական կլինեն նաև «Մուրացան» համալսարանական հիվանդանոցի բուժաշխատողների համար:
