ԵՊԲՀ հանրային առողջության ֆակուլտետը կազմակերպել էր բաց դռների օր՝ հանրային առողջապահական մագիստրոսական ծրագրերի վերաբերյալ:
Ողջունելով ներկաներին, Հանրային առողջության ֆակուլտետի դեկան Մարինե Հովհաննիսյանը ներկայացրեց ծրագրի մանրամասները:
«Ֆակուլտետում գործում են մի քանի մագիստրոսական ծրագրեր. առողջապահության կազմակերպում և կառավարում, համաճարակաբանություն և շրջակա միջավայրի հիգիենա: Բացի մագիստրոսական ծրագրերից ունենք նաև բիզնես վարչարարության ծրագիրը, որը վերաբերում է նրանց, ովքեր ունեն աշխատանքային փորձ: Մեր ծրագրին կարող են դիմել ինչպես բժիշկները, այնպես էլ ցանկացած մասնագիտություն ունեցող անձիք»,-նշեց նա:
Դեկանը խոսեց նաև ծրագրի առաքելության ու տեսլականի մասին՝ մանրամասնելով, թե ինչ է նշանակում որակավորումը, ինչ հնարավորություններ կարող են ձեռք բերել շրջանավարտները և ինչ ոլորտներում կարող են պաշտոններ զբաղեցնել, ինչ կառուցվածք և տևողություն ունեն հանրային առողջապահական ծրագրերը, որոնք են դիմելու պահանջները, ընթացակարգերը և վերջնաժամկետները և այլ մանրամասներ:
Այնուհետև մասնակիցների հետ իրենց փորձով կիսվեցին հանրային առողջապահական մագիստրոսական ծրագրի դասախոսները՝ խոսելով իրենց անցած ուղու մասին:
«Բժշկական համալսարանի տվյալ կուրսը ոչնչով չի զիջում արտերկրի կուրսերից: Ամեն երկրում չկան այսպիսի մատչելի և բարձր որակի կուրսը, որը ձեզ տալիս է մագիստրոսի դիպլոմ: Ծրագրի այս խտացված տարբերակը մոտ է միջազգային մակարդակին»,-կարծիք հայտնեց հանրային առողջապահական մագիստրոսական ծրագրի դասախոսներից Մարտին Ալեքսանյանը, որը մասնագիտությամբ իրավաբան է:
Կլինիկական հոգեբան Մարիետա Խուրշուդյանը, որը ևս ծրագրի դասախոսներից է, մեծ ոգևորությամբ ներկայացրեց մի շարք առավելություններ, ինչը տալիս են մագիստրոսական գիտելիքները:
«Իմ ներսում այս մասնագիտությունն անվանել եմ կյանքի մասնագիտություն, ինչու՞, որովհետև շատ յուրահատուկ հմտություններ է տալիս: Այս մասնագիտությունն իսկապես ձևավորում է կառավարչի, լավ մենեջերի մտածողություն: Այն մտածողություն փոխող մասնագիտություն է, որը սովորելուց հետո մոտեցումը կյանքի խնդիրների լուծումներին միանշանակ փոխվելու է»,-ասաց դասախոսը:
Ներկաների հետ իրենց մասնագիտական հաջողություններով և փորձով կիսվեցին տարբեր տարիների ընթացքում ֆակուլտետի շրջանավարտները՝ ընդգծելով, որ հանրային առողջապահությունն այլ մտածելակերպ է, և ծրագիրն ավարտած մարդիկ այլ կերպ են մտածում՝ լավ հասկանալով միմյանց:
