Բժշկական մայր բուհի բակում, բաց երկնքի տակ տեղի ունեցավ ԵՊԲՀ «Հերացի» ավագ դպրոցի ավարտական միջոցառումը: Բժշկական համալսարանի լեփ-լեցուն բակը 183 շրջանավարտի ճանապարհեց դեպի մեծ ու պատասխանատու կյանք: Հիշարժան օրվա տոնական սկիզբն ազդարարեց «Հերացի» ավագ դպրոցի տնօրեն Նարինե Սարգսյանը:
«Եվս մեկ ուսումնական տարի ավարտվեց: Իմ շատ սիրելի շրջանավարտներ, դուք նոր կյանք եք մտնում, ուզում եմ, որ այն լինի արժանապատիվ: Շրջանավարտների շարքում են միջազգային օլիմպիադաների մասնակիցներ և մեդալակիրներ: Փառք ու պատիվ բոլոր այն աշակերտներին, ովքեր վստահաբար նոր կյանք պետք է մտնեն ստացած գիտելիքներով, կրթությամբ և այն արժեքային համակարգով, որը պատիվ կբերի իրենց ընտանիքներին և մեր հայրենիքին: Իմ խորին շնորհակալությունն եմ հայտնում մեր մանկավարժական կոլեկտիվին, որը ոչ մի ջանք չի խնայում, որպեսզի ժպիտով, հարգալից, աշակերտակենտրոն մոտեցմամբ կրթություն մատուցի՝ պատիվ բերելով ավագ դպրոցին»,-նշեց ավագ դպրոցի տնօրենը` շնորհակալություն հայտնելով բժշկական համալսարանին շարունակական աջակցության համար։
ԵՊԲՀ ռեկտոր Արմեն Մուրադյանը շնորհավորելով շրջանավարտներին ՝ նորանոր ձեռքբերումներ մաղթեց:
«Մեզ համար այսօր ևս պատվարժան և հիշարժան օր է։ Հերացիականների մեկ սերունդ հանրակրթական փուլն ավարտելով թևակոխում է մեծ կյանք: Կարող ենք արձանագրել, որ 21-րդ դարում մարդն առանց կրթության, անշուշտ, կարող է լինել կենսաբանորեն երջանիկ, բայց նա չի կարող երջանկացնել ոչ իր ընտանիքին, ոչ իր ժողովրդին, եթե չունենա կրթական բարձր ցուցանիշ: Այս հնարավորությունը, որն ընձեռել են ձեզ ձեր ուսուցիչները ամենամեծ հարստություններից է: Երջանկության գրավականն է ՝ կրթություն ստանալ հայրենիքում: Կրթության այս փուլն ավարտելով՝ ձեզնից յուրաքանչյուրի առջև կա հնարավորություն շարունակել ակադեմիական կրթական համակարգում: Այն խստությունը, որը ինչ-որ չափով ձեզ լարվածության էր բերում այս փուլում, երկրորդ փուլում ավելի է բարձրանալու: Ես ուզում եմ, որ դուք այդ խստությանը վերաբերվեք որպես ձեր հնարավորությունների բազմապատկիչ, այդ խստությունը համեմված է գթասրտությամբ, ծնողական հոգատարությամբ»,-ասաց բուհի ղեկավարը՝ ընդգծելով, որ վերջին զանգը ապագայում նորանոր հաջողություններ կերտելու մեկնակետ է։
Տոնական միջոցառմանը ներկա էր նաև կրթության փորձագետ, հասարակական-քաղաքական գործիչ Անահիտ Բախշյանը, որը շնորհավորելով շրջանավարտներին իր բարեմաղթանքները հղեց. «Որպես լավատես մարդ նայում եմ ձեզ և ասում ՝ կեցցե՛ «Հերացի» ավագ դպրոց, որ ձեր պայծառ, անուշ աչքերն այսպես լուսավոր փայլում են»:
Այնուհետև ելույթի խոսքով հանդես եկան և շնորհավորական խոսքեր հնչեցրին նաև «Հերացի» ավագ դպրոցի փոխտնօրեններ Գայանե Աթոյանն ու Անահիտ Զոհրաբյանը, ինչպես նաև դպրոցի ավագ ուսուցիչները:
Ջերմ խոսքերից հետո, շրջանավարտների պարային ֆլեշմոբով և միասնության շուրջպարով ամփոփվեց տոնական ու գեղեցիկ միջոցառումը, որը մշտապես հիշելու առիթներ է պարգևելու հերացիականներին:
