ԵՊԲՀ «Հերացի» ավագ դպրոցի «Հրաժեշտ պատանեկությանը» խորագրով ավարտական միջոցառումը բաց երկնքի տակ էր, դպրոցի շինհրապարակում:
Դպրոցի հիմնանորոգման աշխատանքները մեկնարկել էին 2019 թվականի նոյեմբերին, պետք է ավարտվեին 2021 թվականի ամռանը, սակայն դեռ ընթացքի մեջ են: Քանի որ արդեն շրջանավարտ աշակերտները չունեցան հնարավորություն սովորելու դպրոցի շենքում, որոշեցին ավարտական ուսանողական միջոցառումն անցկացնել հենց հարազատ կրթօջախի տարածքում:
«Թևակոխում եք կյանքի նոր փուլ, որը հագեցած է լինելու մեծ պատասխանատվությամբ, որոշումներով, ընտրություններ կատարելով: Ձեր ունակություններն ու գիտելիքները, որոնք ձեռք եք բերել այս տարիներին, ծառայեցնելու եք Ձեր երկրին, ժողովրդին, ընտանիքներին»,- դիմելով հերացիականներին նշեց ԵՊԲՀ ռեկտոր Արմեն Մուրադյանը՝ հավելելով, որ հրաժեշտ են տալիս դպրոցին, բայց ոչ ընկերներին և առավել ևս ուսուցիչներին, որոնց շնորհիվ կարողացել են ամբողջական պատկերացում ստեղծել այն մեծ կյանքի վերաբերյալ, որն այսօրվանից իրենց առջև է:
«Այդ կյանքը շատ հետաքրքիր է, լի դժվարություններով, մարտահրավերներով, հնարավորություններով: Ցանկանում եմ, որ յուրաքանչյուր դժվարություն, որը ձեր առջև ծառանա, դառնա հնարավորություն: Ձեր հնարավորությունները ծառայեցրեք առաջին հերթին հայրենիքին, մեր Հայաստանին, ունենաք երջանիկ, անփորձանք ապագա»,- ընդգծեց բժշկական բուհի ղեկավարը:
Նրա գնահատմամբ՝ դպրոցում իրականացվող հիմնանորոգումը ևս մեկ օրինակ է, թե ինչպես է պետք պատասխանատու վերաբերվել պարտավորություններին: Օրինակ է նաև ջանքերի, որոնք բժշկական բուհը, դպրոցի ղեկավարությունը ներդնում են սովորողների համար՝ ժամանակակից հարթակների ստեղծման, կրթությունը միջազգային հնարավորություններով համադրելու ուղղությամբ:
«Հայրենիքում աշխատելն առանձնահատուկ երջանկություն է: Ընտրություն կատարելիս միշտ հիշեք, որ այդ ընտրությունը հայրենիքում իրականացնելը երջանկության հիմքն է: Երբեք մի կորցրեք կապը դպրոցի, ուսուցիչների և հայրենիքի հետ: Սա ամուր հաջողությունների գրավականն է»,- հավելեց ռեկտորը:
«Հերացի» դպրոցի հիմնանորոգումն իրականացվում է Ասիական զարգացման բանկի միջոցոցներով և ՀՀ կառավարության համաֆինանսավորմամբ:
Շինհրապարակում միջոցառման անցկացումը պատահական չէր, այն հատուկ խորհուրդ ուներ. այն է հետագա կյանքը նախագծել ու կառուցել ամուր հիմքերի վրա և որակով:
«Կյանքը, ինչպես և շենքը պետք է ճիշտ նախագծել և կառուցել, որպեսզի ունենաք ամուր կառույց: Մաղթում եմ, որ ստացած գիտելիքները, հայրենասիրությունը, արժեքային համակարգը գլխավորի ձեր հետագա կյանքում և հաջողություններում»,- «Հերացի» ավագ դպրոցի տնօրեն Նարինե Սարգսյանի խոսքն էր ուղղված շրջանավարտներին:
Ինտերակտիվ, տոնական, մշակութային և ազգային շնչով հագեցած բացօթյա միջոցառմանը ներկա էր նաև կրթության փորձագետ, հասարակական-քաղաքական գործիչ Անահիտ Բախշյանը, որը կոչ արեց աշակերտներին լինել պարտաճանաչ և պատասխանատու:
Նշենք, որ «Հերացի» ավագ դպրոցն այս տարի ունի 160 շրջանավարտ` նրանցից 114 կենսաքիմիական ենթահոսքից: Բժշկական համալսարանի դիմորդ է դպրոցի 107 շրջանավարտ:
Դպրոցը տարիներ շարունակ առանձնանում է հանրապետության դպրոցների շարքում շրջանավարտների` բարձրագույն ուսումնական հաստատություններ դիմելու հաջողված ցուցանիշներով:
