Կանանց միջազգային օրվա առթիվ շնորհավորական խոսքով մեկնարկեց ռեկտորատի հերթական նիստը։
«Սիրելի կանայք, դուք ձեր ներկայությամբ լցնում եք մեր առօրյան ջերմությամբ և կյանք եք ներշնչում համալսարանական գործունեությանը՝ դառնալով և՛ զսպող, և՛ առաջ մղող ուժ։ Համոզված եմ, որ հենց ձեր ներկայությունն է մեզ բոլորիս պարտավորեցնում առավել պատասխանատու, զգոն ու աչալուրջ մոտենալ մեր ամենօրյա աշխատանքին»,- ի դեմս ԵՊԲՀ-ում աշխատող բոլոր իգական սեռի ներկայացուցիչների՝ դիմելով ռեկտորատի անդամ կին կոլեգաներին, նշեց ԵՊԲՀ ռեկտոր Արմեն Մուրադյանը՝ հավելելով, որ պատիվ է աշխատել և արարել նույն հաստատությունում ու զգալ այն շարժիչ ուժը, որը կանայք հանդիսանում են բոլոր ոլորտներում, այդ թվում՝ բժշկագիտության բնագավառում։
Ընթացիկ հարցերին անցնելուց առաջ ռեկտորը տեղեկացրեց, որ նախորդ շաբաթվա վերջին պրոռեկտորների, դեկանների և նրանց տեղակալների մասնակցությամբ քննարկումներ է անցկացրել՝ անդրադառնալով բոլոր ֆակուլտետների կրթական ծրագրերի միջազգայնացմանն ուղղված աշխատանքներին։
Այս առումով, նրա գնահատմամբ, 2026 թվականը կմնա բժշկական բուհի պատմության մեջ որպես միջազգայնացման գործընթացների ամբողջացման և համալրման տարի։ Համալսարանի միջազգային ճանաչմանն ուղղված աշխատանքները ոգևորիչ են և շարունակական։
Առաջիկա ծրագրերի թվում է մարտի վերջին 5-րդ լսարանի բացումը, որի վերանորոգումն ու արդիականացումը իրականացվում է «Վերադարձ» ծրագրի շրջանակում, և այն կրելու է վիրաբույժ Գագիկ Պիվազյանի անունը։
Արմեն Մուրադյանը ռեկտորատի անդամներին ներկայացրեց նաև իր նոր խորհրդականին։ Ուսանողական խորհրդարանի նախագահ Միշել Քոչարյանը նշանակվել է ռեկտորի խորհրդական։
Մասնավորապես, ուսանողների հետ աշխատանքի փորձ ունեցող համալսարանականը աջակցելու է մի շարք ուղղություններով, այդ թվում՝ համալսարանում աֆիլյացիոն գործընթացի, երիտասարդությանը վերաբերող բուհական նախաձեռնություններին և հարցերին։
Ռեկտորն առանձնակի կարևորեց ուսանողության ֆիզիկական առողջությանն ուղղված ծրագրերի իրականացումն ու դրանց շարունակականությունը՝ Ֆիզիկական դաստիարակության ամբիոնի և դասախոսական կազմի հետ համատեղ։
Միշել Քոչարյանը շնորհակալություն հայտնեց վստահության համար և պատրաստակամություն հայտնեց կյանքի կոչելու վերոնշյալ նախաձեռնությունները։
Հաջորդիվ համալսարանական երեք հիվանդանոցների գլխավոր բժիշկները ներկայացրին շաբաթվա ընթացքում կատարված աշխատանքները։
Կրթության պատասխանատուները ևս, ըստ ոլորտների, զեկուցեցին ուսումնական գործընթացին վերաբերող ընթացիկ հարցերի մասին։
