«100 տարի ժողովրդի թիկունքին» ծրագիրը շարունակում է վեր հանել մեր քաղաքացիների շրջանում ամենատարածված առողջական խնդիրները:
Համալսարանական երեք՝ «Հերացի» թիվ 1, «Մուրացան» և «Միքայելյան» հիվանդանոցների հմուտ մասնագետները ոչ միայն անվճար ախտորոշում, այլև 50 տոկոս զեղչով իրականացնում են վիրահատական բուժում:
«100 տարի ժողովրդի թիկունքին» ծրագրի ընթացքում «Հերացի» թիվ 1 համալսարանական հիվանդանոցի Դիմածնոտային վիրաբուժության և ԼՕՌ կլինիկա դիմած 21, 22 և 43 տարեկան արական սեռի պացիենտների մոտ ախտորոշվել է քթի միջնապատի դեֆորմացիա, կատարվել է վիրահատություն:
Հիվանդների հետվիրահատական վիճակը գնահատվում է բավարար:
Վիրահատություններից երեքն իրականացվել է Դիմածնոտային վիրաբուժության և ԼՕՌ կլինիկայի բժիշկ Մանանա Բաղդասարյանի կողմից:
Վիրահատող բժշկի խոսքով՝ հիվանդության ախտանշաններն են՝ դժվարացած շնչառությունը, գլխացավերը, անքնությունը, սրտանոթային խնդիրները, որոնք ազդում են կյանքի որակի վրա և կարող են այլ հիվանդությունների զարգացման պատճառ հանդիսանալ:
Ինչպես նշեց Մանանա Բաղդասարյանը, քթի միջնապատի դեֆորմացիա ախտորոշմամբ ևս հինգ քաղաքացի վիրաբուժական բուժում կստանա առաջիկա շաբաթվա ընթացքում: