Կարիերայի կենտրոնի նախաձեռնած «Լանցետ» (LanZzete) միջազգային ուսանողական ծրագրի շրջանակում ապագա բժիշկները նեղ մասնագիտական հմտությունների երկրորդ փուլի ընթացքում ներկայացրին ձեռք բերված վիրաբուժական փորձն ու գիտելիքները:
Երևանի Մխիթար Հերացու անվան պետական բժշկական համալսարանի տեղագրական անատոմիայի և օպերատիվ վիրաբուժության ամբիոնի փորձարարական վիրասրահում աշխատում էին անոթային, միկրո և պլաստիկ, ինչպես նաև աբդոմինալ վիրաբուժության թիմերը:
Անոթային վիրաբուժության թիմի համակարգող Տիգրան Սևյանի խոսքով՝ նպատակն ապագա բժիշկներին տեխնիկապես պատրաստելն է, իսկ հետագայում նրանք կհարստացնեն իրենց փորձը նաև կլինիկաներում: «Անոթային վիրաբուժության թիմը կկատարի շունտավորում և պրոթեզավորում: Համալսարանն ավարտելուց հետո ուսանողներն այս ծրագրի շնորհիվ բավականին խոշոր քայլերով առաջ կգնան իրենց մասնագիտության ոլորտում», – ավելացրեց Տիգրանը:
Միկրո և պլաստիկ վիրաբուժության թիմի համակարգող Մերի Ղարագյոզյանն, իր հերթին նշեց, որ վիրահատարանում իրենց աշխատանքը ներառում է 2 բաղադրիչ՝ օրգանական հյուսվածքի 1,5-2 մմ զարկերակի բերանակցում ծայրը ծայրին եղանակով և մաշկային դեֆեկտների շտկում տեղային մաշկային հյուսվածքներով:
Իսկ աբդոմինալ վիրաբուժության թիմի համակարգող Միխաիլ Բոլյանը տեղեկացրեց, որ իրենք աշխատում են աղիքային բերանակցման ձևավորման վրա՝ կողքը կողքին եղանակով: «Ուսանողները սովորում են աղիքի ծայրատի ձևավորում, տանող ու բերող գալարների համադրում և բուն բերանակցման ձևավորում», – նշեց Միխաիլը:
Փորձարարական վիրահատարանում կատարված աշխատանքի արդյունքներով ժյուրին, որի կազմում են ԵՊԲՀ հետբուհական և շարունակական կրթության գծով պրոռեկտոր Գառնիկ Ավետիսյանը, Կարիերայի կենտրոնի ղեկավար Խաչատուր Մարգարյանը, Վիրաբուժության թիվ 1 ամբիոնի վարիչ Սուրեն Ստեփանյանը և Տեղագրական անատոմիայի և օպերատիվ վիրաբուժության ամբիոնի վարիչ Սեմյոն Օրդույանը, կընտրի այն հաջողակներին, որոնք հնարավորություն կստանան մասնակցելու «Լանցետ» ծրագրի հաջորդ փուլին:
