Կորոնավիրուսային համավարակի դեմ պայքարը միասնական գաղափարի շուրջ է համախմբել աշխարհի բժշկական համայնքը: Մարդկանց առողջացումն ու համավարակի հաղթահարումն այսօր օրակարգային է բժիշկների համար. այդ բեռի մեծ մասը բաժին է հասել վարակաբաններին:
ԵՊԲՀ ինֆեկցիոն հիվանդությունների ամբիոնի 3-րդ կուրսի օրդինատոր, «Նորք ինֆեկցիոն» կլինիկական հիվանդանոցի վարակաբան Լենա Նազարյանն այն բժիշկներից է, որը վարակաբանի մասնագիտությունն ընտրել է գիտակցաբար՝ վստահ լինելով, որ ցանկացած համավարակի ժամանակ լինելու է առաջնագծում: «Դեռ փոքր տարիքից երազել եմ բժիշկ դառնալու մասին: Հիշում եմ՝ շարադրություն էի գրել, որ բժիշկ եմ դառնալու, որպեսզի զինվորներն ալևս չմահանան: Բուհի ավարտական քննություններից հետո ունեի նախընտրած մի քանի մասնագիտություններ, բայց ընտրեցի հենց վարակաբանի մասնագիտացումը»,- հիշում է օրդինատորը՝ ավելացնելով, որ մասնագիտության հանդեպ հետաքրքրությունն առաջացել է հենց ուսանողական տարիներին:
Լենա Նազարյանը վարակաբանի մասնագիտությունն ընտրելիս, իհարկե, արդեն գիտեր, որ համաճարակների դեպքում լինելու է առաջնագծում՝ բժիշկ-գործընկերների կողքին, բայց չէր մտածում, որ այդ ամենն իրեն կվիճակվի օրդինատուրայում սովորելու ընթացքում, և ինքը կհայտնվի համավարակի դեմ պայքարի էպիկենտրոնում:
Խոսելով խոչընդոտների մասին՝ սովորողը նշում է. «Դժվարություններ շատ են եղել, թե՛ ֆիզիկական, թե՛ հոգեբանական, և թե՛ մասնագիտական առումով, բայց համավարակը հաղթահարելու հույսը, անասելի ուժ է տվել: Բոլորս դարձել էինք մի ընտանիք՝ նույն գաղափարի շուրջ համախմբված»,:
Լենա Նազարյանի խոսքով՝ համավարակի օրերին ծանրաբեռնված աշխատանքի ընթացքում ձեռք է բերել անփոխարինելի և մեծ փորձ, որն օգտակար կլինի ամբողջ կյանքի ընթացքում: «Այս պայմաններում մասնագիտական, գործնական նոր գիտելիքները յուրաքանչյուրիս օգնեցին մասնագիտության մեջ ավելի կայանալու հարցում»,-համոզված է ինֆեկցիոն հիվանդությունների ամբիոնի օրդինատորը:
Այն ապագա բժիշկներին, որոնք որոշել են ընտրել վարակաբանի մասնագիտությունը, սովորողը վստահեցնում է՝ մասնագիտական ճիշտ ուղի են ընտրել. «Եկե՛ք և մենք միասին կպայքարենք վարակների դեմ»:
Համավարակի ընթացքում Լենա Նազարյանն ավելի է համոզվել, որ մասնագիտության ընտրության հարցում կայացրել է ճիշտ որոշում. «Կշարունակեմ իմ մասնագիտական հետագա գործունեությունը որպես վարակաբան՝ ամեն պահի լինելով հիվանդի կողքին և պատրաստ՝ ցանկացած համավարակի դեմ պայքարին»:
Զրուցեց՝ Մարգարիտա Մխիթարյանը
Լուսանկարները՝ Լենա Նազարյանի անձնական արխիվից