Բժշկության մեջ կարևոր է բուժման արդյունքների ամփոփումը և հետաքրքիր դեպքերի ներկայացումը: Յուրաքանչյուր դեպք մարդկային կյանք է և այն փրկելու համար հաճախ բժիշկների մի ամբողջ թիմի երկարատև աշխատանք է պահանջվում: Հայ բժիշկների կողմից ներկայացված այս դեպքը ոչ միայն հետաքրքիր է, այլև հազվագյուտ ,մինչ այժմ համաշխարհային բժշկական գրականության մեջ նմանատիպ ընդամենը 35 դեպք է գրանցված:
Երիտասարդ կինը կեսարյան հատումից հետո 2016թ. հոսպիտալացվել էր «Արմենիա» ՀԲԿ-ի Վիրաբուժության կլինիկա՝ մարսողական ուղուց արյունահոսությամբ: Էնդոսկոպիստ Կարեն Մանուկյանի (ներկայումս՝ Միքայելյան համալսարանական հիվանդանոցի էնդոսկոպիայի ծառայության ղեկավար) կողմից հայտնաբերվել է կերակրափողի վարիկոզ լայնացած երակներ, կատարվել է լիգավորում, որն ապահովել է հեմոստազ ամբողջ բուժման ընթացքում:
Կատարվել է համակարգչային շերտագրություն, որի ընթացքում ռադիոլոգ Ելենա Բաղդասարյանը («Արմենիա» ՀԲԿ, Ախտորոշիչ ծառայություն) հայտնաբերել է անոթային խուղակ՝ լյարդային զարկերակի և դռներակի միջև, որն էլ բերել էր դռներակային հիպերտենզիայի և արյունահոսության: Ներանոթային միջամտությունների մասնագետ Տիգրան Պողոսյանի (Ուռուցքաբանության Ազգային կենտրոն, «Բեստ Լայֆ» ԲԿ) կողմից կատարվել է նշված խուղակի խցանում՝ էմբոլիզացիա գերազանց արդյունքով:
Բուժման մոտ մեկ ամսվա ընթացքում պացիենտը գտնվել է Վիրաբուժության կլինիկայում պրոֆեսոր Սուրեն Ստեփանյանի, վիրաբույժներ Հայկ Սաֆարյանի (ԵՊԲՀ Վիրաբուժության թիվ 1 ամբիոն, Միքայելյան համալսարանական հիվանդանոցի Վիրաբուժության կլինիկա), Հայկ Հովհաննիսյանի (ներկայումս՝ «Մասիս» ԲԿ տնօրեն), հսկողության տակ, կատարվել են միջամտություններ:
Թերապևտիկ բուժման ամբողջ ընթացքը կարգավորվել է դոցենտ Գագիկ Հակոբյանի, Մանիկ Գեմիլյանի (ԵՊԲՀ գաստրոէնտերոլոգիայի ամբիոն, Միքայելյան համալսարանական հիվանդանոցի Թերապիայի բաժանմունք) կողմից: Ներկայումս պացիենտը լավ վիճակում է, հետվիրահատական բարդություններ չեն դիտվել: