Բժշկական համալսարանի ղեկավարությունն այսօր հանդիպեց պաշտոնական մեկշաբաթյա այցով Հայաստանում գտնվող Santé Arménie (Առողջապահություն Հայաստան) նախաձեռնության անդամներին։
ԵՊԲՀ ռեկտոր Արմեն Մուրադյանը Ֆրանսիայից ժամանած հայ մասնագետներին շնորհակալություն հայտնեց հայաստանյան գործընկերներին և համալսարանական հիվանդանոցներին ցուցաբերած աջակցության համար։
Ռեկտորը ներկայացրեց համալսարանական երեք հիվանդանոցի, ինչպես նաև Հայրենիքի պաշտպանի վերականգնողական կենտրոնի գործունեությունը՝ անդրադառնալով վերջին տարիներին այս կառույցներում կատարված աշխատանքներին և զարգացման ծրագրերին:
Բուհի ղեկավարը տեղեկացրեց, որ ստեղծումից ի վեր՝ կենտրոնում արդեն շուրջ 3000 զինծառայող ստացել է վերականգնողական բուժում։
Խմբի անդամ, անեսթեզիոլոգ-ռեանիմատոլոգ Աննա Կարմենյանը ներկայացրեցնելով 300-400 տարբեր նեղ մասնագիտացում ունեցող բժիշկներ միավորող կազմակերպությունը՝ շեշտեց, որ նպատակ ունեն խթանել առողջապահության ոլորտի զարգացումը, ինչպես նաև նպաստել Հայաստանում կլինիկական հետազոտությունների կենտրոնի կառուցմանը:
Հյուրերը նշեցին, որ պետական բժշկական բուհի հետ համագործակցությունը շատ կարևոր է, քանի որ համալսարանը, կրթական կառույցները զարգացման ճիշտ հիմքեր են ստեղծում։
Արմեն Մուրադյանը ևս ընդգծեց, որ բժշկական համալսարանում մեծ տեղ է հատկացվում կլինիկական հետազոտությունների անցկացմանը: Ռեկտորը ներկայացրեց նաև ԵՊԲՀ-ում մեկնարկած «Ուղեղի հիմնարար հետազոտությունների գիտակրթական կենտրոնի» (ՈՒՀՀԳԿ) ստեղծման աշխատանքները։
Գիտելիքները հարստացնելու, կատարելագործելու նպատակով երկկողմ կարևորվեց ինչպես բժիշկների, այնպես էլ ապագա մասնագետների ներգրավվածությամբ փոխանակային ծրագրերի, փոխայցելությունների կազմակերպումը:
ԵՊԲՀ-ում հրավիրված քննարկումից հետո Ֆրանսիայից ժամանած պատվիրակությունն այցելեց Հայրենիքի պաշտպանի վերականգնողական կենտրոն:
Նշենք, որ «Առողջապահություն Հայաստան» նախաձեռնությունը Ֆրանսիայում միավորում է առողջապահության ոլորտի մասնագետների՝ ֆրանսիական հեղինակավոր հաստատություններից: Արդեն 20 տարուց ավել տարբեր նախաձեռնությունների շրջանակում կառույցը աջակցում է Հայաստանին:
