Բժշկական համալսարանում այսօր միախառնվել էին անցյալն ու ներկան, հինն ու նորը: ԵՊԲՀ ուսանողական խորհրդարանի նախաձեռնությամբ «Երբ հանդիպում են սերունդները» միջոցառման շրջանակում գլխավոր հերոսները հայ և արտասահմանցի ուսանողներն էին, որոնք երգի, պարի, ասմունքի միջոցով ցույց տվեցին իրենց սերը հայրենիքի, մայրաքաղաքի և բուհի հանդեպ:
Անցած տարիների փորձն ու գիտելիքը փոխանցվում են սերնդեսերունդ, իսկ երիտասարդների նորարությունը, խիզախությունն ու մտքի ճկունությունը մեր առջև բացում են ապագայի նոր հորիզոններ: Այս կամուրջը, որը նրանք են կառուցում, թույլ է տալիս դառնալ ավելի հզոր, ամուր ու միասնական՝ բուժելով ոչ միայն մարմինը, այլև հոգին: Նրանք կրթվում ենք այստեղ, որտեղ սերունդները՝ երիտասարդներն ու փորձառուները լրացնում են միմյանց՝ ստեղծելով ուժ, որն ի զորու է փոխել մոլորակը: Նրանք ստանձնել են շարունակել այդ ճանապարհը, սերունդների միջև կապը դարձնելով ավելի ամուր:
ԵՊԲՀ ռեկտոր Արմեն Մուրադյանը ողջունելով պրոֆեսորադասախոսական կազմին, ուսանողներին և ներկաներին՝ ընդգծեց, որ «Երբ հանդիպում են սերունդները» խորագիրը կրող միջոցառումը ոգևորիչ է, քանի որ ներկաները հիշում են իրենց և ակամայից ուզում են տեսնել ավելի հմուտ և իմաստուն: «Պարտավորեցնող է երկու հանգամանք, որ դահլիճում գտնվում են մարդիկ, որոնք այս համալսարանը կերտողներն են, և երիտասարդներ, որոնք ստանձնելու են այդ պարտավորությունը:
Ներկան, անցյալն ու ապագան առաջին հերթին հանդիպում են ընտանիքում, դպրոցում, և այդ հանդիպումների վերջնակետը համալսարանն է, որտեղ դուք դառնում եք ներկա և դառնում եք ապագա ձևավորողները: Եվ պարտավորեցնող է, քանի որ մեկդարյա պատմություն ունեցող բուհում ձևավորվել է մեր ժողովրդի առողջություն ստեղծողների կրթությունը՝ վիթխարի պատասխանատվությունը, որը մեզնից յուրաքանչյուրը զգացել է: Այսպիսի միջոցառումները ևս մեկ անգամ թույլ են տալիս երախտիքի խոսքեր հղել մեր ուսուցիչներին և ընդգծել ուսանողության դերը»,- ասաց ռեկոտրը՝ գոհունակություն հայտնելով, որ ուսանողները գիտակցելով այդ կարևորությունը կազմակերպել են այս միջոցառումը:
ԵՊԲՀ ուսանողական խորհրդարանի նախագահ Միշել Քոչարյանի խոսքով՝ միջոցառման հիմքում սերն էր՝ առ հայրենիք, մասնագիտություն, պետություն, սերունդներ և Երևան:
«Սա ևս մեկ հնարավորություն էր շեշտադրելու այն փաստը, որ մեր դուհի նահապետերն «Alma mater»-ի հենասյունն են: Եվ որքան էլ փոխվեն սերունդները, հներն ունեն իրենց ուրույն տեղն ու դերը, իրենց ճիշտ դիմագիծն ու ձեռագիրը»,- ասաց նա՝ եզրափակելով, որ նրանք ջանք ու եռանդ չեն խնայում բանիմաց մասնագետներ կրթելու ու դաստիարակելու գործում:
100-ամյա բժշկական դարբնոցում այսօր ներկաները զգացին, թե ինչպես է սերունդների հանդիպումը հանգեցնում գիտական ձեռքբերումների, ստեղծում նոր մարդկային կապեր՝ հիմնվելով սիրո, համերաշխության ու հարգանքի վրա:
Այսօր մենք հիշեցինք, որ անցյալը մեր հիմքն է, ներկան մեր պայքարը, իսկ ապագան մեր ուղեղի և սրտի միասնությունը:
