ԵՊԲՀ օրթոպեդիկ ստոմատոլոգիայի ամբիոնում անցկացվեց բաց դաս, որի ժամանակ օտարերկրացի ուսանողները հանդես եկան իրենց պատրաստած զեկույցներով:
Ամբիոնի վարիչ Աննա Վարդանյանը նշեց, որ բաց դասն իր տեսակով եզակի է, քանի որ այն հնարավորություն է տալիս ուսանողներին լսողի դերից բացի, զեկուցողի դերում հանդես գալ:
«Այս տեսակ փորձը ուսանողներին սովորեցնում է ինքնուրույն օգտվել գրականության աղբյուրներից, ձևավորում է մտածելակերպ, օգնում է ստացած գիտելիքները կիրառել ինքնուրույն աշխատանքներ կատարելու ժամանակ: Զեկուցողները երկրորդ կուրսի ուսանողներ են, ովքեր դեռ նոր են սկսում մասնագիտական առարկաներ անցնել: Այս կիսամյակ նրանք անցնում են նյութագիտություն առարկան, այդ պատճառով բաց դասի թեման օրթոպեդիկ ստոմատոլոգիայում կիրառվող նյութերի, նրանց հատկությունների, կիրառման ոլորտների մասին է»,-ասաց նա:
Օրթոպեդիկ ստոմատոլոգիայի դասախոս Արտակ Հեբոյանն էլ իր հերթին նշեց, որ բաց դասի հիմնական նպատակը ուսանողների շրջանում թե’ մասնագիտական առարկայի, թե’ ընդհանուր բժշկության հանդեպ հետաքրքրությունն ավելացնելն է:
«Բաց դասի կարգախոսն է՝ ամեն ինչ գիտելիքից է սկսվում: Ավելի լավ է ունենալ ճիշտ գործիքակազմ և անգամ քիչ նյութերով կարողանալ լավ արդյունք ստանալ,-ասաց նա ՝ ավելացնելով, որ ուսանողները նիդերլանդցի, իրանցի, սիրիացի և ամերիակացի են:
Այնուհետև ուսանողները զեկույցներով հանդես եկան՝ խոսելով կերամիկայի, փայլեցնող նյութերի, պլաստմասսայի և այլնի մասին:
