Երևանի պետական բժշկական համալսարանի և Օստրավայի համալսարանի միջև այսօր փոխըմբռնման հուշագիր ստորագրվեց:
Համատեղ հետաքրքրություն ներկայացնող ոլորտներում համագործակցության և փոխանակման հիմքեր ստեղծելու մասին փաստաթուղթը ստորագրեցին ԵՊԲՀ ռեկտոր Արմեն Մուրադյանը և Օստրավայի համալսարանի Համաճարակաբանության և հանրային առողջության ֆակուլտետի դեկան Ռաստիսլավ Մադարը:
«Մեզ համար որպես միջազգային բուհ յուրաքանչյուր համագործակցություն կարևոր նշանակություն ունի»,- ողջունելով արտերկրի մասնագետներին նշեց ռեկտորը` հավելելով, որ եվրոպական զարգացած համալսարանների հետ գործակցությունը տարբեր ուղղություններով է ընթանում և մասնավորապես գիտական բնագավառում:
Բժշկական համալսարանում կրթություն է ստանում 33 երկրի 2030 օտարերկրացի ուսանող և նոր կապերի ստեղծումն ու ընդլայնումը մշտապես օրակարգում է:
Ռաստիսլավ Մադարը տեղեկացրեց, որ Օստրավայի համալսարանն ունի 6 ֆակուլտետ, որից մեկը բժշկական է:
«Բժշկական ֆակուլտետում 30 կրթական ծրագրեր են իրականացվում, որոնք ընդգրկում են նաև բուժքույրական գործը, մանկաբարձությունը, այլ ոլորտներ»,- ասաց դեկանը, ով նույնպես հետաքրրքված էր գիտական համագործակցությամբ: Նա հավելեց, որ իրենց համալսարանում նոր գիտական կենտրոն է հիմնվել:
Կողմերը պատրաստակամություն հայտնեցին առաջիկայում ստեղծել հնարավորություններ ստորագրված հուշագրով սահմանվող գործակցությունն ամրապնդելու ուղղությամբ:
Այնուհետև, Գիտության գծով պրոռեկտոր Կոնստանտին Ենկոյանի ուղեկցությամբ շրջայց կազմակերպվեց ԵՊԲՀ «ՔՈԲՐԵՅՆ» ուղեղի հիմնարար հետազոտությունների գիտակրթական կենտրոնում: Ներկայացվեց գիտական կառույցի գործունեությունը: