ԵՊԲՀ ռազմաբժշկական ֆակուլտետի 6-րդ կուրսի ուսանողներ՝ Ավետիս Ղազարյանն ու Հովիկ Սարգսյանը ՀՀ պաշտպանության նախարարության հավաքական թիմով մասնակցել են «ՎՏԲ Լիգա» ֆուտբոլային մրցաշարին, և այս անգամ ևս վերադարձել են 1-ին տեղի մեդալներով: Սա այս տարի տղաների երկրորդ հաղթանակն է: Նախորդ ամիս ԵՊԲՀ ռազմաբժշկական ֆակուլտետի հավաքական թիմով, մասնակցելով ՀՀ ԶՈՒ ֆուտզալի առաջնությանը, նրանք զբաղեցրել էին առաջին պատվավոր տեղն ու վերդարձել մեդալներով ու հաղթական գավաթով:
«ՎՏԲ Լիգա» ֆուտբոլային մրցաշարին, որը տեղի է ունեցել «Դինամո» մարզադահլիճում նոյեմբերի 8-ից դեկտեմբերի 6-ը, մասնակցում էին ՀՀ պաշտպանության նախարարության, ֆինանսների, կրթության և գիտության, սփյուռքի, գյուղատնտեսության, տարածքային կառավարման և զարգացման, աշխատանքի և սոցիալական հարցերի նախարարությունների և ոստիկանության ներկայացուցիչները:
Մրցաշարի եզրափակիչ փուլում Պաշտպանության նախարարության հավաքական թիմը, որի կազմում էին Ռազմաբժշկական ֆակուլտետի ուսանողները, խաղացել է Ոստիկանության թիմի հետ և զբաղեցրել առաջին տեղը՝ երկու գնդակի առավելությամբ:
Նշենք, որ ֆուտբոլային մրցաշարը կազմակերպվել է «ՎՏԲ-Հայաստան բանկ»-ի նախաձեռնությամբ: