Բժշկական մայր բուհում անցկացվեց «Անվտանգ սեռական վարքագիծ» թեմայով դասախոսություն՝ նվիրված սեռական առողջության պահպանմանը:
ԵՊԲՀ սեքսոպաթոլոգիայի ամբիոնի վարիչ, դոցենտ Վրեժ Շահրամանյանը դասախոսության ընթացքում անդրադարձավ տարբեր խնդիրների, սեռական վարքագծին առնչվող արդիական հարցերի, որոնց մասին իրազեկ, կրթված լինելը շատ կարևոր է առողջ և գիտակից անհատ ձևավորվելու համար:
«Սեռական առողջությունը ընդհանուր առողջության մի մասն է, իսկ սեքսոպաթոլոգն այն մասնագետն է, որը զբաղվում է մարդու սեռական առողջության պահպանմամբ և նա ունի իր կարևոր առաքելությունը. մարդուն դարձնում է երջանիկ»,-նշեց ամբիոնի վարիչը` անդրադառնալով նաև շատ կարևոր մի խնդրի. հաճախ մարդիկ, փորձելով տեղեկություն ստանալ սեռական առողջության մասին, օգտվում են սխալ աղբյուրներից, ինչը բացասական հետևանքներ կարող է ունենալ. «Համացանցում հեշտությամբ կարող են վտանգավոր նյութերը գտնել, որոնք թե’ հոգեբանորեն կարող են վատ ազդեցություն ունենալ, թե՛ սեռական վարքագիծը դարձնել վտանգավոր»:
Նրա խոսքով՝ սեռական առողջության պահպանման համար անձը պետք է ճիշտ աղբյուրներից կրթվի:
Վրեժ Շահրամանյանը խոսեց նաև սեռավարակների, սեռական վարքագծի վտանգների, անպտղության մասին, մատնանշեց նման խնդիրներից և բարդություններից խուսափելու եղանակները:
«Սեռավարակները ընթանում են նաև առանց կլինիկական նշանների և այդ պատճառով մարդիկ հաճախ չեն դիմում բժշկի, ուստի սեռավարակներից խուսափելու համար պահանջվում է հստակ գրագիտություն»,-հավելեց նա:
Դասախոսության ընթացքում հակաբեղմնավորման մեթոդներին անդրադարձավ բժիշկ-սեքսոպաթոլոգ Ագնեսա Մալխասյանը՝ հանգամանալից ներկայացնելով դրանց դասակարգումը, խոսելով մասնագիտական բազմաթիվ թեմաներով:
