Օրակարգային բազմաթիվ հարցեր էին ընդգրկված ռեկտորատի` մայիսի 20-ի նիստում։
Ներկաները մեկ րոպե լռությամբ հարգեցին ավիավթարի հետևանքով զոհված իրանցի բարձրաստիճան պաշտոնյաների հիշատակը:
Մեկնարկն ուներ հանդիսավոր մաս։ Հոբելյանների առթիվ ԵՊԲՀ ռեկտոր Արմեն Մուրադյանն իր և ռեկտորատի անդամների անունից շնորհավորեց ԵՊԲՀ գիտահետազոտական կենտրոնի ղեկավար, «Նոր հայկական բժշկական հանդես» գիտակիրառական ամսագրի գլխավոր խմբագիր Արտո Զիլֆյանին և ռեկտորի խորհրդական Եղիշե Տերտերյանին։
«Որպես Ձեր աշակերտ` շնորհակալություն եմ հայտնում Ձեզ` որպես մեծ, ականավոր գիտնական, որպես մարդ, որն իր ամբողջ կյանքը նվիրել է այս համալսարանին, որպես տոհմական բժիշկ և, իհարկե, անփոխարինելի դերակատարում ունեցող անհատ` մեր բոլոր հաջողություններում քննադատաբար, սկզբունքային մոտեցումներով», – ավագ կոլեգայի մասին կարծիք հայտնեց Արմեն Մուրադյանը` շնորհավորելով Արտո Զիլֆյանին 80-ամյա հոբելյանի առթիվ և մաղթելով երկար տարիներ անպակաս լինել համալսարանի գործունեությունից:
Պրոֆեսոր Զիլֆյանը ևս ասելիք ուներ.
«Այս տարիների ընթացքում աշխատել եմ վեց ռեկտորի հետ: Նրանցից յուրաքանչյուրն իր ներդրումն ուներ բուհի առաջընթացի գործում, սակայն, որպես կանոն, այդ գործունեությունը սահմանափակվում էր հանրապետական կամ Խորհրդային Միության մասշտաբով: Ուրախ եմ, որ այս տարիքում ականատեսն եմ բժշկական համալսարանի միջազգային հաջողություններին` հավատարմագրմանը ու հսկայական ձեռքբերումներին, որը ոչ միայն հավատարմագրման աշխատանքային խմբի, այլև անձամբ բուհի ղեկավարի շնորհիվ է»:
Եղիշե Տերտերյանի` տնտեսական ուղղությամբ ի նպաստ ԵՊԲՀ-ի զարգացման կատարած աշխատանքը ռեկտորը բարձր գնահատեց` մաղթելով հետագա հաջողություններ։
Նիստի ընթացքում հաստատվեցին ամփոփիչ ատեստավորումների հանձնաժողովների նախագահները։ Այս հարցը զեկուցեց Ուսումնական աշխատանքների գծով պրոռեկտոր Լարիսա Ավետիսյանը` համառոտ ներկայացնելով թեկնածուների մասնագիտական փորձը։ Նա ներկայացրեց նաև Ստոմատոլոգիական և Դեղագիտական ֆակուլտետների` միջազգային հավատարմագրման անցնելու գործընթացների վերաբերյալ զեկույցը, իսկ Մասնագիտական և շարունակական կրթության կենտրոնի միջազգային հավատարմագրման մասին խոսեց Հետբուհական և շարունակական կրթության գծով պրոռեկտոր Գառնիկ Ավետիսյանը։
Շաբաթական կտրվածքով բուհի ղեկավարին ըստ ուսումնական, կլինիկական ոլորտների զեկուցվեց հանձնարարությունների կատարման ընթացքը։ Նիստն ամփոփվեց ուսանողներին վերաբերող և ընթացիկ այլ հարցերով:
