ԵՊԲՀ ստոմատոլոգիական ֆակուլտետի այս տարվա շրջանավարտ Անիտա Մակյանը Լեհաստանում ընթացող Եվրոպական ամառային երրորդ խաղերի բրոնզե մեդալակիր է դարձել։
Կարատե մարզաձևի -68կգ քաշային կարգում Անիտա Մակյանը, հաղթելով իսպանացի Մարիա Նիետոյին և ուկրաինացի Էլինա Մելնիկին, դուրս է եկել կիսաեզրափակիչ, որտեղ, սակայն, 0-4 հաշվով զիջել է Շվեյցարիայի ներկայացուցիչ Ելենա Նորինային ու բրոնզե մեդալ նվաճել:
ԵՊԲՀ ռեկտոր Արմեն Մուրադյանը ռեկտորատի անդամներին ներկայացնելով մարզիկ-ստոմատոլոգի ձեռքբերումները՝ շնորհավորեց նրան՝ նորանոր մարզական և մասնագիտական հաջողություններ մաղթելով: Բուհի ղեկավարը կարևորեց ուսանողների ներգրավվումը նման մրցումներին և կրթությանը զուգահեռ սպորտային, այլ բնագավառների նվաճումները:
«Շատ դժվար է եղել այս ընթացքում զբաղվել պրոֆեսիոնալ սպորտով և պատրաստվել քննություններին: Շնորհակալ եմ բժշկական համալսարանին ինձ սատարելու և քաջալերելու համար»,-հուլիսի 3-ին հրավիրված ռեկտորատի նիստում նշեց միջազգային կարգի սպորտի վարպետ Անիտա Մակյանը:
Նշենք, որ ԵՊԲՀ ստոմատոլոգիական ֆակուլտետի ուսանողներ՝ Անիտա Մակյանը և նրա եղբայրը՝ Դավիթ Մակյանը տարբեր տարիների ընթացքում բազմաթիվ հաջողություններ են գրանցել, ուսանողական խաղերին ներկայացնելով բժշկական մայր բուհը մեդալներ են նվաճել։ Ուսումնառության ողջ ընթացքում քույր և եղբայր Մակյանների հաջողությունները տեսանելի և ոգևորիչ են եղել համալսարանականների համար: