Կալիֆորնիայի Լոս Անջելեսի համալսարանը (UCLA) և Երևանի պետական բժշկական համալսարանը (ԵՊԲՀ), Միջազգային Առողջապահական Կազմակերպության (IHO) հետ համատեղ, շարունակում են իրենց համագործակցությունը՝ կազմակերպելով հերթական առցանց համաժողովը։ Այս անգամ համաժողովի թեման էր «Բժշկական էթիկա»-ն։
Այս վիրտուալ միջոցառումը համախմբել էր բանախոսներ և մասնակիցներ ԵՊԲՀ-ի դասախոսական կազմից, Կարիերայի զարգացման կենտրոնի Կարդիոլոգիայի ընկերակցությունից, ինչպես նաև մի շարք միջազգային առաջատար հաստատություններից, ներառյալ՝ Բրաունի համալսարանը, Բանգլադեշի պետական համալսարանը (SUB), Ալ-Ազհար համալսարանը (Գազա) և Wellness Capital կազմակերպությունը։ Միջոցառումը հարթակ էր՝ քննարկելու ժամանակակից բժշկության էթիկական հիմնախնդիրները տարբեր երկրների փորձագետների դիտարկմամբ։
Սա UCLA-ի և ԵՊԲՀ-ի միջև երկրորդ համատեղ նախաձեռնությունն էր․ նախորդը կայացել էր 2024 թ. մայիսին և նվիրված էր ծխախոտի օգտագործման կանխարգելմանը։
Համաժողովի ընթացքում ներկայացվեցին և քննարկվեցին առանցքային թեմաներ, այդ թվում՝ պացիենտի ինքնավարություն, գիտակցված համաձայնություն, ինչպես նաև նորագույն տեխնոլոգիաների ազդեցությունը բժշկական որոշումների կայացման վրա։