Հայրենիքի պաշտպանի վերականգնողական կենտրոնի գրադարանում տեղի ունեցավ Անուշ Ասլիբեկյանի «Պրոֆեսորը» վիպակի շնորհանդեսը, որին ներկա էին մի շարք հյուրեր, բժիշկներ, դասախոսներ և այլք:
ԵՊԲՀ հոգաբարձուների խորհրդի նախագահ, անվանի կոմպոզիտոր Վահան Արծրունին ողջունելով հյուրերին, նշեց, որ սա վիպակի երկրորդ վերահրատարակումն է՝ նվիրված բժշկապետ Վահան Արծրունու 160-ամյակին:
««Զինվորի տանը» երրորդ գրքի շնորհանդեսն է, շատ խորհրդանշական է, որ հենց այստեղ է անցկացվում: Այստեղ ապաքինվում են մեր մարտիկները, այս համակարգը ստեղծված է նրանց համար: Բժշկական հաստատությունը պետք է կերտի ոչ միայն բժիշկ, այլև մտավորական: Բժշկությունն այն հանգույցն է, որը կապում է սոցիալական բոլոր շերտերը»,- նշեց նա:
Գրքի խմբագիր և նախաբանի հեղինակ Անի Փաշայանը ներկայացնելով վիպակի կառուցվածքը՝ շեշտեց, որ այն փաստական հարուստ նյութի վրա է հիմնված, որտեղ ներկայացված են դրվագներ մեծ բժշկապետի կյանքից՝ գեղարվեստական պատումի լեզվով:
«Շատ հետաքրքիր է ներկայացված վիպակը, բժշկապետի կյանքը տարվում է գեղարվեստական ստեղծագործության առանցք: Անուշին հաջողվել է մեզ տանել այդ արահետներով և համոզել, որ մենք մտածենք բարվոք և ճշմարիտ կյանքի մասին»,-ասաց նա:
Գրքի կառուցվածքը ներկայացնելուց հետո, հեղինակին շնորհավորանքներ և ջերմ խոսքեր հղեցին հյուրերից շատերը:
