Բժշկական համալսարանի Օտարերկրացիների ուսուցման դեպարտամենտի պետի տեղակալ, Հյուսվածաբանության ամբիոնի դոցենտ Անահիտ Ազնաուրյանը Հունաստանի Սալոնիկ քաղաքի Արիստոտելի համալսարանում արժանացել է միջազգային հավաստագրի՝ դասախոսություն կարդալու գերազանց հմտությունների համար։
Եվրոպական ԷՐԱԶՄՈՒՍ+ դասավանդման միջազգային ծրագրի շրջանակում համալսարանական մասնագետը Հյուսվածաբանության, Պաթոլոգիայի և Սրտաբանության ամբիոններում (համալսարանական կլինիկայի սրտաբանական կենտրոնում) կարդացել է 5 դասախոսություն։
Թեմաներն ընդգրկում էին սիրտանոթային համակարգի մորֆոլոգիան, սրտամկանի և անոթային վնասվածքների կլինիկական պաթոլոգիան, դոքսոռուբիցին ցիկլոֆոսֆամիդով հարուցված տոքսիկ, իշեմիկ կարդիոմիոպատիան և դապագլիֆոզինի կիրառումը` որպես կարդիոպրոտեկտոր։
Անահիտ Ազնաուրյանը հույն մասնագետների հետ մասնակցել է նաև Հյուսվածաբանության ամբիոնի քննական շրջանին՝ 1 օր քննություն անցկացնելով 3 խմբի մոտ։
Արիստոտելի համալսարանի վերոնշյալ ամբիոնների ողջ անձնակազմը հիացմունք է արտահայտել հայ մասնագետի ներկայացրած փորձարարական աշխատանքի բարձր որակի վերաբերյալ։ Հավաստագրի համաձայն՝ նա իրեն դրսևորել է որպես լավագույն ձևով պատրաստված հետազոտող և գերազանց դասախոս։
Նշենք, որ սա Անահիտ Ազնաուրյանի երկրորդ այցն էր նույն համալսարան։ Առաջին այցը տեղի էր ունեցել 2017 թվականին։
