Ընդհանուր բժշկության ֆակուլտետի ուսանողները հոկտեմբերի 20-ից 23-ը մասնակցել ենք Ինդոնեզիայում կայացած Երիտասարդ գիտնականների գիտահետազոտական միջազգային մրցույթին (International Research Competition for Young Scientists, IRCYS2022), որտեղ ներկայացրել են իրենց 2 գիտահետազոտական ծրագրերը (“EcoProtein: “Single cell protein” production as a way of recycling fruit and vegetable wastes” և “The Influence of Wi-Fi Rays on Human Cell Cultures: The Difference Between Cancer and Non-cancer Cells”)։
Բժշկական բուհը և Հայաստանը մրցույթին ներկայացրել են ԵՊԲՀ 1-ին կուրսի ուսանողներ Մհեր Սարաֆյանը և Մանե Կուրղինյանը:
Ապագա բժիշկների մենթորներն էին «Հերացի» ավագ դպրոցի ուսուցիչ Ռուբինա Հարությունյանը, որն աջակցել է իրականացրել գիտահետազոտական աշխատանքները սկսած ավագ դպրոցից և ԵՊԲՀ 3-րդ կուրսի ուսանող Մհեր Կուրղինյանը:
Մրցույթին մասնակցել է ավելի քան 1000 թիմ 5 մայրցամաքի տարբեր երկրներից։ Այն կազմված էր 3 փուլից և յուրաքանչյուր թիմ կարող էր առավելագույնը ներկայացնել 2 գիտահետազոտական նախագիծ։ Եզրափակիչ փուլ կարող էր անցնել միայն 50 թիմ։ Հայաստանը այդ 50 թիմի կազմում էր։ Ընդ որում միայն մեր երկիրը ներկայացնող թիմին է հաջողվել անցնել եզրափակիչ փուլ 2 հետազոտական նախագծերով։ Եզրափակիչ փուլը կայացել է Ինդոնեզիայի Յոգյակարտա քազաքում։
«Երևանի պետական բժշկական համալսարանի աջակցությամբ մասնակցեցինք մրցույթի առցանց տարբերակով։ Մեր 2 գիտահետազոտական նախագծերն արժանացել են Գերազանցության մրցանակի (Excellence Award) և ժյուրիների ընտրությամբ մեր նախագծերը ընդգրկվել են այն նախագծերի ցանկում, որոնք պետք է տպագրվեն Ինդոնեզիայի Գիտական խորհրդի ամսագրում (Journal of Indonesia Scientific Society, JISS)»,- պատմում է Մանե Կուրղինյանը:
Մասնակիցների խոսքով` ընթացքը և արդյունքները շատ ոգևորիչ էին և հետագայում ևս նրանք ծրագրում են աշխատել գիտահետազոտական նախագծերի վրա և բարելավել դրանք։
Այժմ երազանքը փոխվել է նպատակի՝ մասնակցելու այլ գիտահետազոտական մրցույթների և համաժողովների:
«Հուսով ենք, որ դա մեզ կհաջողվի։ Քանի որ գիտության ոլորտը մեզ շատ է հետաքրքրում, երեքս էլ ցանկանում ենք ապագայում դառնալ բժիշկ-հետազոտողներ։ Դեռ հստակ չենք որոշել, թե ինչ ուղղությամբ կմասնագիտանանք, սակայն, կարծում եմ, համալսարանում սովորելու տարիների ընթացքում արդեն պարզ կդառնա»,- հավելում է Մհեր Սաֆարյանը:
Նշենք, որ նախկինում ապագա բժիշկները մասնակցել են տարբեր գիտահետազոտական մրցույթների (AESA2021, 2022, ISEF2022, IBO2022, IGP2022 և այլն), բայց որպես «Հերացի» ավագ դպրոցի աշակերտներ։
Այս տարի հնարավորություն ստացան մասնակցել IRCYS2022-ին և ներկայացնել Հայաստանը որպես բժշկական համալսարանի ուսանողներ։
“EcoProtein: Single Cell protein production as a way of recycling fruit and vegetable wastes” նախագիծը իրականացվել Երևանի պետական համալսարանի Մանրէաբանական կենսատեխնոլոգիաների և կենսավառելիքի նորարարական կենտրոնում, իսկ “The Influence of Wi-Fi Rays on Human Cell Cultures: The Difference Between Cancer and Non-cancer Cells” -ը՝ Մոլեկուլային կենսաբանության ինստիտուտում։ Երկու կենտրոնի աշխատակիցներին ուսանողները շնորհակալ են աջակցության համար։