Կայքը դեռ գտնվում է փորձարկման փուլում։
The site is still under testing.

Բժշկի հանդեպ բռնությունը հարիր չէ մեր ժողովրդին, մեր հասարակությանը

Բժշկի հանդեպ բռնությունը հարիր չէ մեր ժողովրդին, մեր հասարակությանը

Օրեր առաջ «Մուրացան» համալսարանական հիվանդանոցում տեղի ունեցած տհաճ և զազրելի դեպքին՝ բուժաշխատողի և անվտանգության աշխատակիցների հանդեպ իրականացրած բռնությանը այսօր ԵՊԲՀ-ում մեկնարկած մանկաբուժությանը և ծերաբուժությանը նվիրված միջազգային համաժողովի ընթացքում անդրադարձավ ԵՊԲՀ ռեկտոր Արմեն Մուրադյանը:

Բուհի ղեկավարը ընդգծեց, որ կատարվածին որևէ արդարացում կամ բացատրություն չի կարող լինել: «Կատարված դեպքը հարիր չէ մեր հասարակությանը:

Բացարձակ կողմնակից չեմ, որ քննարկվի, թե ինչու է տեղի ունեցել այս միջադեպը, առավել ևս կնոջ, առավել ևս երեխայի ներկայությամբ: Իմ հարգանքի և կարեկցանքի խոսքերն եմ արտահայտում բժշկի հանդեպ, որը շարունակել է երեխային բուժօգնություն ցուցաբերել, իսկ տեղի ունեցածը պետք է լինի իրավապահնների տիրույթում և հասարակական պարսավանքի արժանանա, համընդհանուր ուժերով հեռացվեն նման երևույթները մեր ժողովրդի կենցաղից, մեր մշակույթից»,- ընդգծեց Արմեն Մուրադյանը` հավելելով, որ նման դեպքերի պատճառ են հանդիսանում հասարակության մեջ առկա խորը հոգեբանական խնդիրները, որոնք պարբերաբար նման զազրելի դրսևորումներ են ունենում: Նա նկատեց, որ բժշկի օրինակը, երբ բուժօգնություն է տրամադրել երեխային՝ չնայած իր հանդեպ կատարված վիրավորական, վտանգավոր կեցվածքին, օրինակելի է ապագա բժիշկների, ուսանողների համար:

ԵՊԲՀ ռեկտորը հատուկ շնորհակալություն հայտնեց նաև անվտանգության աշխատակիցներին, որոնք պատերազմից հետո վերադառնալով աշխատել են համալսարանական հիվանդանոցում և խիզախություն են դրսևորել՝ պաշտպանելով բժիշկներին և երեխաներին:

Այնուհետև Արմեն Մուրադյանը «Մուրացան» համալսարանական հիվանդանոցի Ընդունարանի և անհետաձգելի բուժօգնութան ծառայության մանկաբույժ Կարինե Թադևոսյանին, «Մուրացան» համալսարանական հիվանդանոցի պահպանության ծառայության ավագ տեսուչ Գևորգ Սարգսյանին և հերթափոխային տեսուչ Ֆրունզ Մխիթարյանին շնորհակալագրեր հանձնեց: