Միջազգայնացումը որակի ապահովման կարևոր բաղադրիչներից է: Այն ուղղված է կրթության որակի ճանաչմանը, համադրելիության և մրցունակության ապահովմանը։ Երևանի պետական բժշկական համալսարանն այս առումով ակտիվ գործունեություն է ծավալում: ԵՊԲՀ ռազմաբժշկական ֆակուլտետը ևս, լինելով բուհի կազմում, որդեգրել է նույն քաղաքականությունը:
ԵՊԲՀ ռազմաբժշական ֆակուլտետի պետ, բուժծառայության գնդապետ, բժշկական գիտությունների թեկնածու, դոցենտ Վարդան Ծատուրյանի խոսքով` վերջին շրջանում ակտիվացել է տարբեր պետությունների կրթական հաստատությունների հետ իրենց ֆակուլտետի համագործակցությունը: «ԵՊԲՀ ռազմաբժշկական ֆակուլտետը հանդիսանում է ՀԱՊԿ երկրների համար կրթագիտական բազա, ՀԱՊԿ երկրների բանակների համար կարող ենք պատրաստել զինվորական բժիշկներ: Գործակցության հիմքը դրվել է դեռևս 4 տարի առաջ, և արդեն անցել ենք գործնական քայլերի»,-ընդգծեց Վարդան Ծատուրյանը: Ղազախստանից Հայաստան է ժամանել չորս կուրսանտ: Մեր երկրի բժշկական համալսարանում սովորելու ցանկություն են հայտնել կուրսանտներ ՀԱՊԿ երկրներից, Ղրղզստանից, Տաջիկստանից, ցանկություն են հայտնել նաև Բելառուսը, Ուզբեկստանը: « Սովորում են 1-ին կուրսից մինչև 6-րդ կուրս, լիարժեք կրթություն են ստանում: Բուհում կրթությունը եռալեզու է՝ հայերեն, ռուսերեն, անգլերեն, իրենք հնարավորություն ունեն կրթություն ստանալ ռուսերեն: Սովորում են նաև հայերեն: ԵՊԲՀ ռազմաբժշկական ֆակուլտետը համագործակցում է նաև Հունաստանի, Բուլղարիայի բուհերի ռազմաբժշկական ֆակուլտետների հետ: Հունաստանի հետ սկսել ենք գործակցությունը, նախատեսում ենք վերապատրաստել բանակի սանհրահանգիչներ: Արդեն առաջարկն ուղարկվել է, քննակման փուլում է»,-նշեց Վարդան Ծատուրյանը:
Վերջերս Վարդան Ծատուրյանն այցելել է Հունգարիայի մայրաքաղաք Բուդապեշտում գտնվող ՆԱՏՕ-ի ռազմաբժշակական գերազանցության կենտրոն: Նա այնտեղ ներկայացրել է Հայաստանի բժշկական մայր բուհի 100-ամյա պատմությունը, կրթագիտական հնարավորությունները: «Ղազախստանից երկու վիրաբույժ՝ Աստանայի, Ալմա Աթայի ռազմական հոսպիտալների վիրաբուժական բաժանմունքների ղեկավարները, հետբուհական կրթության ծրագրով 2018-ին վերապատրաստվեցին մեր ֆակուլտետում: Նրանք մեծ տպավորություններով մեկնեցին Հայաստանից, ստացան ԵՊԲՀ-ի հավաստագրեր»,-ասաց Վարդան Ծատուրյանը: Նա նաև նշեց, որ ՆԱՏՕ-ի անդամ երկրների իրենց գործընկերներին ներկայացրել են համագործակցության՝ զորավարժություններին մասնակցության վերաբերյալ առաջարկների փաթեթ: «Կարծում եմ՝ այդ զորավարժություններին կընդգրկվի ռազմաբժշկական ֆակուլտետի ամբողջ անձնակազմը՝ կուրսանտական, նաև` դասախոսական: Հունաստանում մայիսին մեր դասախոսները կմասնակցեն բժշկական մեծ կոնֆերանսի: Իսկ մեր կուրսանտները Հունաստանում կմասնակցեն իրենց ռազմաբժշկական համալսարանում անցկացվող երկշաբաթյա ստաժավորման աշխատանքներին»: Փորձի փոխանակման ծրագրերն, ըստ Վարդան Ծատուրյանի, շատ են: ԵՊԲՀ ռազմաբժշկական ֆակուլտետը նաև հրավիրել է բժիշկների՝ վերապատրաստվելու, փորձի փոխանակում անցկացնելու բժշկական համալսարանի և պաշտպանության նախարարության կլինիկական հիվանդանոցներում: «Մենք կարող ենք փոխանցել մեր փորձը՝ վիրավոր զինվորներին բուժօգնություն ցուցաբերելու հարցերում: Դա ևս նրանց հետաքրքրել է»,-նշեց Վարդան Ծատուրյանը: Արտասահմանցի գործընկերներն, ըստ Վարդան Ծատուրյանի, հետաքրքրված են Հայրենիքի պաշտպանի վերականգնողական կենտրոնի հնարավորություններով, ցանկություն են հայտնել գալ, անցնել վերապատրաստում:
Ռազմաբժշկական ֆակուլտետի ղեկավարը նշեց, որ միջազգային գործընկերներին հրավիրել են նաև հոկտեմբերին սպասվող բժշկական համալսարանի 100-ամյակին նվիրված գիտաժողովին: Հայաստանի ռազմաբժշկական կրթական ծրագրերով հետաքրքրված են նաև Լեհաստանն ու Իրանը: Չի բացառվում՝ հայ մասնագետները պատրաստեն հնդիկ ռազմական բժիշկների՝ այդ երկրի բանակի համար: Վարդան Ծատուրյանն ընդգծում է, որ Ռազմաբժշկական ֆակուլտետը գործակցության համար բաց է բոլոր երկրների համար: Նա կարևոր է համարում կրթության միջազգային ինտեգրումը: ռազմաբժշկական ֆակուլտետը միջազգային լայն համագործակցության ծրագրերին զուգահեռ՝ կընդլայնի նաև ուսումնական պայմաններն ու հնարավորությունները: Քննարկվում է նոր հարկաբաժին, լրացուցիչ սենյակներ ստեղծելու նախագիծը: 2020 թվականի սեպտեմբերից, ըստ Վարդան Ծատուրյանի, միջազգային գործակցության ծրագրով ֆակուլտետում կսովորի մոտ 30 ուսանող:
Հեղինակ՝ Մայա Խաչատրյան
Լուսանկարները՝ Կարեն Սերոբյանի
