Համալսարանական հարկի ներքո գործող «Հերացի» ավագ դպրոցը դեպի մեծ կյանք ճանապարհեց 153 շրջանավարտի:
Հանդիսության մեկնարկը տրվեց վաղ առավոտյան այն դպրոցի բակում, որտեղ ուսումնառել են շրջանավարտները վերջին երեք տարում:
Շնորհավորական ուղերձները կրթության պատասխանատուների կողմից էին՝ մանկավարժներ, կրթության կազմակերպիչներ, որոնք փոխանցել են աշակերտներին ամենաարժեքավորը` գիտելիք:
Դպրոցի տնօրեն Նարինե Սարգսյանի մեծագույն ցանկությունն է, որպեսզի շրջանավարտները դառնան Հայաստանի արժանի քաղաքացիներ` հայրենասիրությամբ և գիտելիքով զինված, գործեն ի շահ երկրի, լինեն պետականամետ:
Ավարտական հագեցած միջոցառումը ինտերակտիվ բաղադրիչ ուներ. ավարտողները շնորհավորական բարեմաղթանքներ գրառեցին շապիկների վրա:
Հաջորդիվ` ավանդական վալս էր «Վերջին զանգ»-ի առիթով, որից հետո շրջանավարտները դասարաններում մասնակցեցին «Վերջին դաս»-ին, որը վարում էին ուսուցիչները: «Միասնական շղթա» ֆլեշ մոբի ընթացքում բոլոր շրջանավարտները կազմելով մեկ միասնական շղթա իջան բակ:
Դասղեկների հետ «Իմ երեք տարիները դպրոցում…» խորագրով դաս-քննարկումով, օրհնության ծիսակարգով եզրափակվեցին տոնական միջոցառումները:
Հանրակրթական այս հաստատության շուրջ 100 շրջանավարտ Երևանի Մխիթար Հերացու անվան պետական բժշկական համալսարանի դիմորդ է, որոնց մաղթում ենք հաջողություններ և ամենայն բարիք:
Դպրոցի սաները 2024-2025 ուսումնական տարին կդիմավորեն Հրաչյա Ներսիսյան հասցեում տեղակայված և արդեն հիմնանորոգման ավարտին մոտեցած դպրոցում:
