Կայքը դեռ գտնվում է փորձարկման փուլում։
The site is still under testing.

Կյանքից հեռացել է դոցենտ Հակոբ Կարապետյանը

Կյանքից հեռացել է դոցենտ Հակոբ Կարապետյանը

Ցավով տեղեկացանք, որ 86 տարեկանում կյանքից հեռացել է ԵՊԲՀ երկար տարիների աշխատակից, դոցենտ Հակոբ Կարապետի Կարապետյանը:

Նա ԵՊԲՀ 1962 թվականի շրաջանավարտ էր: Նույն տարում գործուղվել էր Ստեփանավանի շրջանի Ագարակ գյուղի բժշկական տեղամաս, որպես բժշկական տեղամասի վարիչ՝ կազմակերպելով մոտակա 4 գյուղերի բնակչությանը բուժօգնության ծառայությունների սպասարկումը:

1964-1965թթ. ուսուցանել է Լենինգրադի «Էվոլյուցիոն ֆիզիոլոգիայի» ինստիտուտում: 1965-1967թթ. անցել էր աշխատանքի Լենինգրադի թիվ 14 պոլիկլինիկայում, որպես տեղամասային թերապևտ:

1967թ. ընդունվել էր աշխատանքի Երևանի պետական ինստիտուտի ներքին հիվանդությունների թիվ 2 ամբիոն, որպես ավագ լաբորանտ, մեկ տարի անց որպես ասպիրանտ և մեկ տարի անց որպես ասիստենտ և հետագայում, որպես դոցենտ նույն ամբիոնում:

1977թ. պաշտպանել էր թեկնածուական թեզ արդի սրտաբանություն թեմայով: Կատարած հետազոտությունների հիման վրա Հայաստանում ներդրել էր էլեկտրոիմպուլսային թերապիայի մեթոդով սրտի ռիթմի կարգավորումը: Տիրապետելով նշված մեթոդին կրթել է մեծաքանակ բժիշկներ՝ Հանրապետական հիվանդանոցում և Երևանի մյուս բժշկական հաստատություններում և մարզերում:

Բազմամյա աշխատանքի տարիներին ակտիվ մասնակցել է ամբիոնի գիտապրակտիկ աշխատանքներին նվիրված՝ սրտամկանի իշեմիկ հիվանդությանը, հիպերտոնիայի, աղեստամոքսային փոփոխությունների մաթեմատիկական վերլուծմանը:

Հանրապետական հիվանդանոցի սրտաբանական բաժնում վարել է հիվանդներ, 15 տարի եղել է վիրաբուժական բաժնի սրտաբան-խորհրդատուն: Մեր երկրի բոլոր մարզերում և գյուղերում կատարել է պրակտիկ բժշկական օգնություն:

Հեղինակ է 52 տպագրված հոդվածների, մեթոդական ձեռնարկների և «Ներքին հիվանդություններ» բժշկական ինստիտուտի ուսանողների համար դասագրքի համահեղինակ է: Պարգևատրվել է ԵՊԲՀ-ի ոսկե մեդալով:

Կոլեգաների, նախկին ուսանողների, բուհի ղեկավարության անունից մեր ցավակցությունն ենք հայտնում Կարապետյանների ընտանիքին: