Երևանի Մխիթար Հերացու անվան պետական բժշկական համալսարանն այս տարի հյուրընկալում է Մանկական ուռուցքաբանության միջազգային միության ասիական (SIOP) 15-րդ համաժողովը։
Մանկական ուռուցքաբանության միջազգային միությունը միակ մուլտիդիսցիպլինար կազմակերպությունն է աշխարհում, որն ամբողջությամբ նվիրված է մանկական և դեռահասների քաղցկեղի բոլոր ասպեկտների ուսումնասիրությանն ու բուժմանը, այդ ոլորտում գիտելիքների ավելացմանը: Ընկերությունն ունի ավելի քան 2600 անդամ ամբողջ աշխարհից՝ ներառյալ բժիշկներ, բուժքույրեր, առողջապահության ոլորտի այլ մասնագետներ, գիտնականներ և հետազոտողներ:
«Մեկդարյա բուհի համար մեծ պատիվ է մայիսի 19-21-ը համախմբել մանկական ուռուցքաբանության ոլորտի առաջատար դերակատարներին՝ նպաստելով ազգային ձեռքբերումների բազմապատկմանը։ Բժշկական համալսարանն արդեն հարյուր տարուց ավելի որդեգրել է հետևողական և կենսական առաքելություն՝ պատրաստել բացառիկ և իրենց գործի գիտակ բժիշկներ։ Այս մասին են փաստում, մասնավորապես, ուռուցքաբանության ոլորտում գրանցված հաջողությունները, միջազգային չափանիշներին համապատասխան կիրառվող ախտորոշման և բուժման մեթոդները»,- կայանալիք միջոցառմանն ուղղված իր խոսքում նշել էր ԵՊԲՀ ռեկտոր Արմեն Մուրադյանը:
Մանկական ուռուցքաբանության միջազգային միության՝ SIOP-ի տեսլականն է․ «Ոչ մի երեխա չպետք է մահանա քաղցկեղից»:
Հայաստանում յուրաքանչյուր տարի գրանցվում է մանկական քաղցկեղի շուրջ 100 առաջնակի դեպք։ Սա համաշխարհային միջին ցուցանիշ է։ Այս երեխաներից 75-ն առողջանում է ամբողջապես, սա շատ մոտ է միջազգային լավագույն ցուցանիշներին։ Ցավոք, մենք տարեկան կորցնում ենք 25 երեխայի, և սա զուտ թվեր չեն մեզ համար։ Շատ կարևոր է այն գիտակցումը, որ քաղցկեղը, հատկապես՝ մանկական, դատավճիռ չէ։
Նախաձեռնողներն ու համակազմակերպիչները վստահ են՝ Մանկական ուռուցքաբանության միջազգային միության և Երևանի Մխիթար Հերացու անվան պետական բժշկական համալսարանի միջև համագործակցությունը կլինի շարունակական, իսկ ասիական 15-րդ համաժողովի անցկացումը մեր երկրի մայրաքաղաքում զգալի ներդրում կլինի առողջացման ցուցանիշների աճի ապահովման գործում։