«Պացիենտի անվտանգության ապահովման ժամանակակից մոտեցումներ» թեմայով կրեդիտավորված անվճար դասընթացները շարունակվեցին նաև «Միքայելյան» համալսարանական հիվանդանոցի միջին բուժաշխատողների համար, զուգահեռաբար նույն օրը` հոկտեմբերի 10-ին ամփոփվեց «Մուրացան» հիվանդանոցի բուժաշխատողների մասնակցությամբ եռօրյա շարքը:
ԵՊԲՀ հիգիենիկ և հակահամաճարակային բաժնի պետ, Համաճարակաբանության ամբիոնի դոցենտ Կարինե Պողոսյանը նշեց, որ եռօրյա դասընթացների ժամանակ կրկին քննարկվելու են բժշկական միջամտություններով պայմանավորված վարակները, ռիսկերը, կանխարգելման միջոցառումները. «Շատ կարևոր է անձնական հիգիենայի պահպանման, ձեռքերի մշակման կանոնները՝ պացիենտների և բուժաշխատողների անվտանգության տեսանկյունից: Քննարկվելու են նաև ներանոթային սարքերով պայմանավորված վարակները՝ ծայրամասային, կենտրոնական, միզային կատետրների վերաբերյալ, դրանց տեղադրման, խնամքի և կանխարգելման հարցերը»:
ԵՊԲՀ-ի Առողջապահական ծրագրերի ազգային գիտահետազոտական կենտրոնի կողմից իրականացվող շարունակական դասընթացների այս փուլի դասախոսները` Կարինե Պողոսյանը և «Մուրացան» համալսարանական հիվանդանոցի գլխավոր բժիշկ, Ինֆեկցիոն հիվանդությունների ամբիոնի դասախոս Հռիփսիմե Ապրեսյանը, գոհ էին սպասված արդյունքներից:
Հռիփսիմե Ապրեսյանը «Ներհիվանդանոցային վարակների կառավարում» թեման ներկայացնելու է ունկնդիրներին, նաև հոկտեմբերի 17-ին «Միքայելյան» հիվանդանոցում:
Նախաձեռնողները լիահույս են, որ գործնական աշխատանքով, հարցուպատասխանի ինտերակտիվ ձևաչափով ուղեկցվող դասախոսությունները մասնակից միջին բուժանձնակազմերի համար կլինեն ուսուցողական և էականորեն կնպաստեն բուժօգնության որակի լավացմանը:
