«Դեղերի ստեղծման առաջընթացը՝ նախագծումից մինչև սպառում» միջազգային եռօրյա գիտաժողովի երկրորդ օրը նվիրված էր Արցախյան երկրորդ պատերազմում հերոսաբար զոհված կլինիկական դեղագետ, բժիշկ, Կլինիկական ֆարմակոլոգիայի ամբիոնի դասախոս, հայցորդ Վահե Մելիքսեթյանին:
Բժշկական բուհի Դեղագիտական ֆակուլտետի 50-ամյակին նվիրված գիտական միջոցառման մասնակիցները հարգանքի տուրք մատուցեցին 44-օրյա պատերազմում զոհված հերացիականներին՝ ծաղիկներ խոնարհելով հերոս հայորդիների հիշատակը հավերժացնող հուշատախտակի մոտ։
Արտասահմանցի հյուրերի, բուհի պրոֆեսորադասախոսական անձնակազմի և հավաքված ապագա բժիշկների համար ցուցադրվեց Վահե Մելիքսեթյանի մասին պատմող տեսանյութ։ Իր մասնագիտության կարևորությունը գնահատելով՝ Վահեն մշտապես ասում էր․ «Պիտի շատ դռներ թակենք, որ ինչ-որ բան ստացվի», իսկ ազատ ժամանակ մասնակցում էր վազքի մրցույթների հանուն բարեգործության։
Պատերազմի առաջին իսկ օրվանից առանց երկմտելու Վահեն մեկնել էր ռազմաճակատ՝ իր զինակից ընկերներին բժշկական օգնություն ցուցաբերելու: Հոկտեմբերի 8-ին՝ հերթական մարտի ժամանակ, անտեսելով վտանգը, նորից նետվել էր կյանքեր փրկելու, բայց զոհվել էր թշնամու հարվածից:
«Անավարտ թռիչք» վերտառությամբ և մեկ րոպե լռությամբ՝ ի հիշատակ զոհված հայորդիների, մեկնարկեցին դեղագիտական ոլորտի միջազգային գիտաժողովի երկրորդ օրվա աշխատանքները։
Իտալիայի Կամերինոյի համալսարանի Փորձարարական բժշկության և հանրային առողջության ամբիոնի մասնագետ Կարլո Պոլիդորին, որն անձամբ ճանաչում էր Վահե Մելիքսեթյանին իտալական համալսարանում ուսանելու տարիներից, նախքան զեկույցը սկսելը հիշեց կենսուրախ, ակտիվ և աշխարհը փոխել ձգտող Վահեին՝ ընդգծելով, որ իր համար մեծ պատիվ էր ճանաչել հերոսին։
Մասնագիտական զեկույցում իտալացի դեղագետն անդրադարձավ կլինիկական ֆարմակոլոգիայի և կլինիկական դեղագիտության առանձնահատկություններին։ «Բժշկի և դեղագետի միջև համագործակցությունը շատ կարևոր է», – մասնավորապես ընգծեց նա։ Կարլո Պոլիդորին շեշտեց նաև, որ շատ տպավորված է գիտաժողովին ուսանողների ակտիվ մասնակցությամբ և հետաքրքրվածությամբ, ինչը չէր նկատել Կամերինոյի համալսարանում։
Ֆրանսիացի դեղագետ, Սորբոնի համալսարանի մասնագետ Մարի Անտինյակն իր զեկույցում ներկայացրեց բժշկական համերաշխության կարևորությունը սրտաբանական բաժանմունքում, ինչի շնորհիվ նվազում է բժշկական սխալի հավանականությունը։
Կանադայից, Շվեյցարիայից և Ամերիկայի Միացյալ Նահանգներից տեսազանգերի միջոցով գիտաժողովին միացան, հարազատ բուհի հարազատ ֆակուլտետի հոբելյանը շնորհավորեցին և մասնագիտական զեկույցներով հանդես եկան ԵՊԲՀ դեղագիտական ֆակուլտետի շրջանավարտներ Տիգրան Ուզունյանը, Արաքսյա Թոփչյանը և Անի Ռոստոմյանը, ավստրալահայ դեղագետ Մովսես Ինջեջիկյանը։
Թբիլիսիի պետական բժշկական համալսարանի մասնագետ Նոդար Սուլաշվիլին անդրադարձավ հետքովիդյան բուժման ընթացքում ֆարմակոլոգիական հետազոտությունների առանձնահատկություններին։
