Հետխորհրդային տարածաշրջանում ամենաարագ զարգացող բժշկական համալսարանը Երևանի Մխիթար Հերացու անվան պետական բժշկական համալսարանն է։
Այս գնահատականը հիմնված է մեծածավալ հետազոտության վրա, որի ընթացքում վերլուծության է ենթարկվել ողջ հետխորհրդային տարածաշրջանի բժշկական համալսարանների, ինչպես նաև բժշկական ֆակուլտետներ ունեցող համալսարանների գեներացրած գիտական արդյունքը։ Այն չափվել է ԱՄՆ Ազգային բժշկական գրադարանում ինդեքսավորված գիտական ամսագրերում տպագրված հոդվածների միջոցով։
Հետազոտության մանրամասները կարող եք գտնել հոդվածում :
Նշված տարածաշրջանից Բժշկական դպրոցների համաշխարհային ռեգիստրում գրանցված է 249 բժշկական համալսարան (կամ համալսարաններ, որոնք ունեն բժշկական ֆակուլտետ)։ Հետազոտության առաջին փուլում հաշվարկվել են բոլոր համալսարանների աշխատակիցների և ուսանողների կողմից տպագրված հոդվածները, և հետազոտության երկրորդ փուլ անցել են այն համալսարանները, որոնք նվազագույնը ունեցել են 500 տպագրված աշխատանք՝ 1991-ից 2024 թվականների ընթացքում։ 249 համալսարանից երկրորդ փուլ անցել են միայն 41-ը: Երկրորդ փուլում չափվել է համալսարանների գիտական աճը։ Առավել օբյեկտիվ լինելու համար, այսինքն՝ հաշվի առնելով վերջին զարգացումները և չանտեսելով պատմական ձեռքբերումները, ձևավորվել է հատուկ գործակից՝ Exponentially Weighted Growth Index (EWGI)։
Ինչպես նշում են հեղինակները, այս մեթոդը թույլ է տվել բնական ճանապարհով առանձնացնել համալսարաններին, որոնք ունցել են իրական և կայուն աճ։
Արդյունքում պարզվել է, որ ողջ հետխորհրդային տարածաշրջանում ամենաարագ զարգացող բժշկական համալսարանը Երևանի Մխիթար Հերացու անվան պետական բժշկական համալսարանն է։
Արագ աճող համալսարանների ցանկում ԵՊԲՀ-ին հաջորդում են Լատվիայի համալսարանը, Սամարայի պետական բժշկական համալսարանը, Սանկտ Պետերբուրգի պետական համալսարանը, Նովոսիբիրսկի պետական համալսարանը և Վիլնյուսի համալսարանը։
Հետազոտությունը կատարվել է Բոստոնի գլոբալ աստիճանակարգման ինստիտուտի (The Boston Institute for Global Rankings) կողմից, որն ակադեմիական նախաձեռնություն է, որի հիմնադիրների մեջ նաև ԵՊԲՀ շրջանավարտներն են։