Կայքը դեռ գտնվում է փորձարկման փուլում։
The site is still under testing.

ԵՊԲՀ շրջանավարտն իր ներդրումն է ցանկանում ունենալ ռևմատիկ հիվանդությունների բուժման և ոլորտի զարգացման գործում

ԵՊԲՀ շրջանավարտն իր ներդրումն է ցանկանում ունենալ ռևմատիկ հիվանդությունների բուժման և ոլորտի զարգացման գործում

Սոնա Մարդոյանը բժշկական կադրերի 100-ամյա դարբնոցի այս տարվա շրջանավարտներից է:  Բուհը գերազանցությամբ ավարտած սովորողի խոսքով՝  համալսարանն իրեն հնարավորություն է ընձեռել նախ ճանաչել ինքն իրեն, ձեռք բերել ոչ միայն մասնագիտական փորձ ու գիտելիքներ, այլև լավ ընկերներ:

Խոստովանում է, որ մինչև համալսարան ընդունվելը լիարժեք չի պատկերացրել  ոչ միայն մասնագիտությամբ, այլև կոչմամբ բժիշկ լինելու բարձր արժեքը, քանի որ ընտանիքում բժիշկներ չեն եղել, սակայն ուսանողական տարիներին սկսել է մարդուն, նրա առողջությունը ընկալել որպես բարձրագույն արժեք և ձևավորվել է օգնելու պատրաստակամություն և պատասխանատվության բարձր զգացում:

«Խոսել բժշկական համալսարանի մասին կարելի է անվերջ։ Ուսանողական տարիներին ունեցել եմ բազմաթիվ դժվարություններ, որոնք հաղթահարվել են կամքի ուժի, նպատակասլացության ու ձգտման շնորհիվ, բայց բացի դժվարություններից ունեցել եմ ձեռքբերումներ, որոնք անգին են ինձ համար»,- նշում է Սոնան։

Կուրսի այն խմբում, որտեղ սովորել է նա, գերակշիռ մասը գերազանց է հանձնել պետական ավարտական քննությունները։ Բացի բարձր առաջադիմությունից՝  լավ ընկերներ են։  ԵՊԲՀ սովորողը շնորհակալ է կուրսընկերներին՝ հաջողություններում ներդրում ունենալու համար։

Ուսումնառության 4-րդ կուրսում, ինչպես Սոնան է բնորոշում, սիրահարվել է ռևմատոլոգիային։

«Պետական քննություններից առաջ այն վերածվեց մեծ սիրո, ու հիմա չեմ պատկերացնում իմ կյանքն առանց բժշկագիտության այս ճյուղի:  Ուզում եմ ռևմատիկ հիվանդությունների բուժման և ոլորտի զարգացման, կատարելագործման գործում ունենալ իմ ներդրումը»,- նշում է կլինիկական օրդինատորը:

Բժշկությունը նա համեմատում է արվեստի հետ, իսկ բժիշկներին համարում է մտավորականության ներկայացուցիչներ, արվեստին մշակույթին մոտ կանգնած մարդիկ, ովքեր բուժական գործողություններից զատ նաև դարեր շարունակ լուսավորչական աշխատանք են իրականացնում հասարակության մեջ:

«Մարդկանց ապաքինելը, նրանց բժշկելը կատարյալ արվեստ է ինձ համար, առանց որի հնարավոր չէ պատկերացնել մեր կյանքը, դրա զարգացումն ու առաջընթացը»,- ընդգծում է ԵՊԲՀ շրջանավարտը՝ ձգտելով դառնալ որակյալ մասնագետ և իր ամենօրյա աշխատանքով նպաստել բուժառուների առողջության պահպանմանն ու կյանքի որակի բարելավմանը: