ԵՊԲՀ ֆարմակոգնոզիայի ամբիոնի ասիստենտ Արշալույս Ղազարյանը ներգրավվել է նարդես (բոխ) բուսատեսակի պոպուլյացիաները հայտնաբերելու և նույնականացնելու նպատակով ամբիոնում ՀՀ գիտության կոմիտեի դրամաշնորհային ծրագրի համաձայն կատարվող գիտահետազոտական աշխատանքի շրջանակում ՀՀ ԳԱԱ Ա.Թախտաջյանի անվան Բուսաբանության ինստիտուտի գիտարշավային խմբում:
Գիտարշավի շնորհիվ հնարավոր է եղել հայտաբերվել բույսի աճման վայրերը` Արագածոտնի մարզ, Բյուրական:
Բուսաբանների ջանքերի շնորհիվ (Հայաստանի ֆլորայի գենետիկական ռեսուրսների պահպանության բաժնի վարիչ՝ Անուշ Ներսիսյան, առաջատար գիտաշխատողներ՝ Ալեքսանդր Ռուդով, Սոնա Գալստյան) հայտնաբերված բուսատեսակը նույնականացվեց որպես նարդես կոշտավուն (Ferula rigidula DC):
Նշենք, որ Նարդեսը (Ferula L.), նեխուրազգիների ընտանիքի բազմամյա խոտաբույսերի ցեղ է: Հայտնի է մոտ 130, իսկ մեր հանրապետությունում՝ 4 տեսակ՝ Ն պարսկական (F.persica), Ն. Սովիչի (F. szowitsiana), Ն. կոշտավուն (F. rigidula) և Ն. արևելյան (F.orientalis):
Տարածված է Արագածոտնի, Կոտայքի, Տավուշի, Վայոց ձորի, Սյունիքի մարզերում, Երևանի շրջակայքում: Աճում է չոր, քարքարոտ լանջերին: Ծաղկում է վաղ գարնանը: Միջազգային գիտական աղբյուրների տվյալներով՝ արմատի հանուկը կիրառվում է որպես հակաբորբոքային, կծկանքալույծ և ցավազրկող, իսկ տերևների և խոտի հեղուկ հանուկը՝ որպես հակահելմինթային և խորխաբեր միջոց: Բույսի պատրաստուկները խթանում են մարսողությունը և ցուցաբերում գազահան ազդեցություն: Ուսումնասիրվում է նաև բույսի հակադիաբետիկ ազդեցությունը: Բույսը պարունակում է եթերայուղ և խեժային նյութեր: Հասունացած պտուղները օգտագործում են որպես համեմունք:
Հայաստանի ֆլորայի այս բուսատեսակը նախագծի շրջանակում հետաքրքրություն է ներկայացնում որպես դեղամիջոց և սննդի կենսակտիվ հավելում:
Բույսը ներկայացվել է հերբարիզացման ՀՀ ԳԱԱ Ա.Թախտաջյանի անվան Բուսաբանության ինստիտուտում:
ԵՊԲՀ ֆարմակոգնոզիայի ամբիոնի ասիստենտ Արշալույս Ղազարյանը հետազոտում է բույսի վերգետնյա և ստորգետնյա հատվածներից անջատված լուծամզվածքների բաղադրությունը և եթերայուղի բաղադրությունը: